Ish-ylli i futbollit kinez dhe trajneri i ekipit kombëtar të meshkujve, Li Tie, është dënuar me 20 vite burg për korrupsion, raportuan mediat shtetërore kineze të premten.
Li Tie, 47 vjeç, i njohur si një nga futbollistët më të mirë kinezë të gjeneratës së tij, luajti për Everton në Premier League në fillim të viteve 2000, krah yjeve të futbollit, si Wayne Rooney, duke u bërë një figurë e njohur ndërkombëtare. Por karriera e tij si trajner u zbeh nga akuza për ryshfete dhe manipulim ndeshjesh.
Li u arrestua si pjesë e një hetimi të gjerë për korrupsion në futbollin profesionist kinez, i nisur pas eliminimit zhgënjyes të ekipit kombëtar në fazën e parë të Kupës së Botës FIFA 2022 në Katar.
Në mars, gjatë gjykimit të tij në Wuhan, prokurorët e akuzuan atë për marrjen e mbi 50 milionë juanëve (rreth 6,8 milionë dollarë) ryshfet midis viteve 2019 dhe 2021, kur ai ishte trajner i ekipit kombëtar. Li u akuzua gjithashtu për manipulimin e ndeshjeve të klubeve që drejtoi midis viteve 2015 dhe 2019.
Gjatë një dokumentari të transmetuar nga televizioni shtetëror kinez në janar, para fillimit të gjyqit, Li shfaqi pendesë për veprimet e tij, duke pranuar se kishte zgjedhur rrugën e gabuar. “Kur isha lojtar, e përbuzja manipulimin e ndeshjeve,” tha ai. “Por si trajner, e pashë si një rrugë të shkurtër për të arritur sukses.”
Li Tie konsiderohej një ikonë e futbollit kinez, duke qenë një nga lojtarët e parë kinezë që luajti në Premier League dhe përfaqësoi Kinën në Kupën e Botës 2002. Dënimi i tij është një tjetër goditje për vizionin e liderit Xi Jinping për ta kthyer Kinën në një “superfuqi të futbollit.” (A2 Televizion)
A2 CNN Livestream
MUND TE LEXONI GJITHASHTU
