Amnesty International dhe Sport & Rights Alliance kanë kërkuar që FIFA të pezullojë procesin e shpalljes së Arabisë Saudite si mikpritëse e Kupës së Botës 2034 derisa vendi të ndërmarrë reforma të rëndësishme në fushën e të drejtave të njeriut. Sipas raportit të publikuar, kandidatura saudite nuk përmbush kriteret e FIFA-s për respektimin e të drejtave ndërkombëtare të njeriut.
Ndërkohë, FIFA pritet të shpallë zyrtarisht vendet pritëse për Kupat e Botës 2030 dhe 2034 në dhjetor, me Arabinë Saudite si kandidatura e vetme për edicionin e vitit 2034. Ndër projektet e mëdha që Arabia Saudite ka premtuar për këtë organizim përfshihen ndërtimi i 11 stadiumeve të reja dhe 185,000 dhoma hotelesh, ndër të tjera.
Megjithatë, drejtuesit e Amnesty thonë se këto plane do të kërkojnë një numër të madh punëtorësh emigrantë, të cilët janë të ekspozuar ndaj abuzimeve nën sistemin “Kafala” të sponsorizimit. Ky sistem i lidh punëtorët me një punëdhënës specifik, duke i bërë ata pre e shfrytëzimit, përmes mbajtjes së pasaportave dhe punës së detyruar. Amnesty paralajmëron se shumë do të vdesin, ndërsa të tjerë do të përballen me zhvendosje të detyruar dhe diskriminim.
Kreu i të Drejtave të Punës dhe Sportit në Amnesty International, Steve Cockburn, tha se Arabia Saudite nuk ka treguar një angazhim të vërtetë për reforma dhe se “FIFA duhet të ndalojë procesin e kandidaturës derisa të vendosen mbrojtje të besueshme për të drejtat e njeriut.”
Ndërkohë, kandidatura për Botërorin 2030, e cila do të organizohet nga Spanja, Portugalia dhe Maroku, gjithashtu është nën shqyrtim për shkak të shqetësimeve për të drejtat e njeriut, përfshirë përdorimin e dhunshëm të forcave të policisë në disa vende dhe rrezikun e dëbimeve të detyruara në Marok për projekte të mëdha infrastrukturore. (A2 Televizion)
A2 CNN Livestream
MUND TE LEXONI GJITHASHTU
