Kalendari i një pushtimi gjakatar
24/02/2022: Putin shpall “operacionin special ushtarak” në orët e para të mëngjesit të 24 shkurtit. Bombat e para tronditën Kievin dhe qytetet e tjera të Ukrainës.
Në fjalimin e mbajtur para nisjes së sulmeve, Putin tha se kjo po bëhej për të “demilitarizuar” dhe “denazifikuar” Ukrainën.
Një shkëmbim kërcënimesh mes ushtarëve rusë dhe ukrainas në ditën e parë të luftës u bë simbol i qëndresës.
24/02/2022: Fitorja e parë e madhe e rusëve ishte kapja e bazës ajrore Antonov.
Por për shkak të kundërpërgjigjes së ukrainasve, aeroporti doli jashtë funksionit dhe nuk u përdor dot nga rusët për të furnizuar ushtrinë me armatime.
25/02/2022: Zelensky-Putinit: Ne jemi këtu! Presidenti i Ukrainës refuzoi ofertën e Shteteve të Bashkuara për t’u larguar nga vendi.
02/03/2022: Në 24 orët e para të sulmit, mbi 100 mijë ukrainas u larguan nga vendi. Sot, një vit pas luftës, numri i tyre ka shkuar në mbi 3 milionë.
06/03/2022: Luftimet e ashpra shkaktuan shkatërrim në infrastrukturën e qyteteve.
Sipas autoriteteve ukrainase, qindra civilë humbën jetën në përpjekje për t’u larguar nga vendi.
09/03/2022: Sulmohet me bomba materniteti i Mariupolit. Foto e një gruaje shtatzënë që largohej nga spitali i shkatërruar u bë simbol i absurditetit të luftës. Gruaja dhe foshnja humbën jetën të dy.
16/03/2022: Rusia bombardoi teatrin e Mariupolit. Brenda godinës kishte 1300 vetë, prej të cilëve 300 humbën jetën.
Rusia mohoi akuzën, edhe pse po e bombardonte prej javësh qytetin. Jashtë godinës ishte shkruar me germa cirilike në rusisht fjala “fëmijë”.
01/04.2022: Zbulohet masakra e Buchas. Trupat ruse lanë pas gjak dhe shkatërrim gjatë tërheqjes.
Pamjet tronditëse dëshmuan makabritetet ndaj civilëve, çka bëri që të kërkohej hetimi i Rusisë për krime lufte.
14/04/2022: Mbytet “Moskva”, anija kryesore ruse në Detin e Zi. Ukraina mori përsipër sulmin, Rusia tha se ndodhi për shkak të një zjarri në bord. Sidoqoftë, kjo ishte humbja më e madhe e flotës ruse në 40 vitet e fundit.
17/05/2022: Mbrojtja që forcat ukrainase i bënë për dy javë metalurgjikut Azovstal u bë një tjetër simbol i qëndresës.
Sipas Ukrainës, kjo pengoi avancimin e Rusisë më në perëndim të vendit dhe kapjen e qytetit kyç në Detin e Zi, Zaporizhia.
01/09/2022: Rusët largohen nga Kharkivi.
Pas një kundërofensive të fortë, ukrainasit arritën të rimerrnin pjesë të mëdha të territorit.
Moska e quajti tërheqjen “rigrupim”.
Por dështimi i turpshëm u kritikua nga mbështetësit e Putinit, përfshi edhe lideri çeçen Ramzan Kadyrov.
21/09/2022: Nis mobilizimi i pjesshëm në Rusi, i pari që prej Luftës II Botërore.
Vendimi shkaktoi protesta në të gjithë vendin dhe eksod të burrave për të shmangur rekrutimin.
08/10/2022: Ukraina hodhi në erë urën e vetme që lidhte Krimenë me Rusinë.
Ura, me domethënie simbolike dhe strategjike, u inaugurua nga Putini në 2018-n, 4 vite pas aneksimit të gadishullit.
10/10/2022: Nisi një fazë e re e luftës, Rusia sulmoi me bomba infrastrukturën energjetike të Ukrainës.
Si rezultat, qytete të tëra mbetën pa elektricitet dhe ujë.
12/11/2022: Pas 8 muajsh agresioni brutal, qyteti jugor Kherson u çlirua nga forcat ukrainase. Pak javë para largimit të trupave të tij, Putini e kishte shpallur qytetin pjesë të Rusisë.
21/12/2022: Zelensky udhëtoi për në SHBA, ku u takua me Presidentin Joe Biden.
Ishte një vizitë historike, e para që prej nisjes së pushtimit.
Para mbërritjes së Zelensky-t, Biden deklaroi se SHBA-ja do t’i jepte Ukrainës 2 milionë dollarë shtesë në ndihma. Mes tyre edhe sistemi i mbrojtjes kundërajrore, Patriot.
20/01/2023: Pas disa javësh me manovra politike, Gjermania miratoi dërgimin e tankeve Leopard 2 në Ukrainë. Edhe SHBA-ja premtoi tanke 31 M1 Abrams për ushtrinë e Kievit.
20/02/2023: Joe Biden kthen vizitën në Kiev. “Ukraina reziston, demokracia reziston”, deklaroi Biden.
Punoi: Adri Myftiu, Romina Çota (A2 Televizion)
A2 CNN Livestream
MUND TE LEXONI GJITHASHTU
