Britania do të shpallë Wagner, organizatë terroriste

Nga A2 CNN
6 Shtator 2023, 09:35 | A2 CNN në Ukrainë
Britania do të shpallë Wagner, organizatë terroriste

Qeveria e Mbretërisë së Bashkuar pritet së shpejti të shpallë grupin e mercenarëve rusë të Wagner si organizatë terroriste. Kjo nënkupton mes të tjerash se do të jetë e paligjshme të jesh anëtar apo të mbështesësh organizatën.

Shumë shpejt drafti do të kalojë në parlament dhe nëse ai do të votohet do të lejojë që dhe pasuritë e mercenarëve të Wagner të kategorizohen, si të ardhura nga terrorizmi dhe për pasojë dhe të sekuestrohen.

Në fjalën e saj, sekretarja e Brendshme, Suella Braverman e cilësoi grupimin si të dhunshëm dhe shkatërrimtar dhe një mjet ushtarak në duart e Vladimir Putinit.

“Vijimi i aktiviteteve destabilizuese të Wagnerit vetëm sa vazhdojnë t’i shërbejnë qëllimeve politike të Kremlinit. Ata janë terroristë”, u shpreh mes të tjerash Braverman.

Wagner ka luajtur një rol kyç në pushtimin rus të Ukrainës, si dhe në operacionet ushtarake në Siri dhe vende të ndryshme në Afrikë, duke përfshirë Libinë dhe Malin. Luftëtarët e saj janë akuzuar për një sërë krimesh duke përfshirë vrasjen dhe torturimin e qytetarëve ukrainas.

Emri i grupit tani do të shtohet së bashku me atë të organizatave të tjera të ndaluara në Mbretërinë e Bashkuar si Hamasi dhe Boko Haram.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Erion Dushi