Një oficer policie është ndaluar nga Agjencia e Mbikëqyrjes Policore (AMP) pasi është kapur duke shpërdoruar detyrën. Bëhet fjalë për oficerin me inicialet, A.XH., 31 vjeç. I riu, duke shfrytëzuar pozicionin, ushtronte presion dhe mashtronte qytetarët, që shoqëroheshin me doza narkotike, kundrejt parave.
“Nga hetimet e kryera janë arritur të dokumentohen veprimet korruptive të oficerit A.XH., i cili duke keqpërdorur atributet që i jep detyra si oficer në Seksionin e Hetimit të Narkotikëve në DVP Durrës e duke shfrytëzuar pozicionin, ushtronte presion dhe mashtronte shtetasit, që shoqëroheshin me doza narkotike, kundrejt përfitimeve monetare”, thuhet në një njoftim të AMP.
Hetimet vazhdojnë deri në dokumentimin e plotë të kësaj veprimtarie të kundërligjshme, teksa ndaj tij rëndojnë akuzat për kryerjen e veprave penale “Korrupsioni pasiv i personave që ushtrojnë funksione publike” dhe “Shpërdorim i detyrës”.
Për këtë rast ka reaguar edhe ministri i Brendshëm, Taulant Balla.
"Sapo kemi dërguar para drejtësisë një tjetër oficer policie me gradën N/Komisar në Drejtorinë Vendore të Policisë Durrës, të përfshirë në korrupsion dhe minim të luftës së policisë kundër trafikimit dhe shpërndarjes së lëndëve narkotike. Përgëzoj Agjencinë e Mbikëqyrjes Policore për dokumentimin e plotë të provave në kuadër të këtij procedimi penal dhe përfundimit të hetimeve në bashkëpunim të ngushtë me Prokurorinë pranë Gjykatës Shkallës Parë të Juridiksionit Përgjithshëm Durrës", thekson Balla.
MUND TE LEXONI GJITHASHTU
