Një aksident i rëndë ka tronditur Holandën, ku tre persona, mes tyre dy fëmijë, humbën jetën pasi një makinë u përplas me një grup çiklistësh gjatë një ekskursioni shkollor.
Ngjarja ndodhi rreth orës 12:30 të së dielës në një rrugë pranë Vogelwaarde, në provincën e Zeeland. Sipas mediave të huaja, automjeti goditi një grup prej 14 fëmijësh që po lëviznin me biçikleta së bashku me dy shoqëruesit e tyre.
Si pasojë e përplasjes, tre persona humbën jetën në vendngjarje, ndërsa katër fëmijë të tjerë pësuan lëndime të rënda dhe u transportuan me urgjencë në spital. Autoritetet nuk kanë bërë ende publike moshat e fëmijëve të plagosur.
“Një makinë përplasi një grup prej 14 fëmijësh me biçikleta dhe dy shoqërues gjatë ekskursionit të tyre shkollor. Gjatë këtij incidenti, për fat të keq humbën jetën tre persona, përfshirë dy fëmijë dhe një të rritur”, njoftuan autoritetet lokale.
Policia ka nisur hetimet për të zbardhur rrethanat e aksidentit tragjik, ndërsa komuniteti lokal është në shok pas ngjarjes së rëndë.
(A2 Televizion)
A2 CNN Livestream
MUND TE LEXONI GJITHASHTU
