Një burrë i armatosur me shpata kërcënon policinë në Francë

Një burrë që mbante dy shpata në duar dhe kërcënonte policët në një qytet të Francës, është plagosur rëndë pasi efektivët e qëlluan.

Ngjarja ndodhi në një rrugë të frekuentuar në Vitry-sur-Seine, afër Parisit, në orën 17:40, kur burri kërcënoi drejtpërdrejt oficerët e policisë dhe refuzoi të ulte armët.

Mediat raportojnë se një oficer policie në detyrë e vuri re burrin duke mbajtur një shpatë në secilën dorë.

Një ekip i policëve ka intervenuar por i dyshuari ka kërcënuar policinë duke iu afruar oficerëve. Më pas një oficer policie e qëlloi dy herë me armën e shërbimit.

Punonjësi i policisë që hapi zjarr ishte edhe ai që i dha ndihmën e parë agresorit, ndërsa u asistua më pas nga zjarrfikësit dhe shërbimet e urgjencës. Pista e një sulmi të mundshëm terrorist duket se është përjashtuar, por prokuroria publike e Créteil, po e mban çështjen nën shqyrtim.

Autori sakaq ndodhet në spital dhe është jashtë rrezikut për jetën.

  (A2 Televizion)