Dy policë të Kosovës janë pezulluar nga detyra për shkak të pretendimeve të një qytetari të Mitrovicës së Veriut, se është rrahur prej tyre.
Inspektorati Policor i Kosovës ka rekomanduar pezullimin e dy policëve, për shkak se më 26 tetor kanë keqtrajtuar Millosh Subotiqin nga Mitrovica e Veriut.
“Inspektorati Policor, në kuadër të kompetencave ligjore, do të ndërmarrë edhe veprime të tjera hetimore në koordinim me organin kompetent për zbardhjen e rrethanave të këtij rasti”, thuhet në njoftim.
Policia e Kosovës i ka mohuar pretendimet e Subotiqit dhe ka thënë se ai kishte qenë i dehur dhe kishte tentuar që të dëmtonte një pronë private.
Lidhur me këtë incident kanë reaguar disa organizata joqeveritare serbe nga veriu i Kosovës, të cilat kanë ndërprerë bashkëpunimin me Misionin e Bashkimit Evropian për Sundimin e Ligjit në Kosovë EULEX, derisa të japin një qëndrim për këtë rast.
“Në këtë kontekst dhe në përputhje me mandatin e EULEX-it, roli ynë është t'i përcjellim hetimet e kryera nga Inspektorati Policor i Kosovës dhe nga prokuroria”, tha EULEX-i.
Megjithatë, grupi i organizatave joqeveritare – Aktiv, Nisma e Re Sociale, Qendra për Veprime Afirmative Sociale, Qendra për Përfaqësimin e Kulturës Demokratike dhe Instituti për Zhvillim Ekonomik Territorial, këmbëngul se Policia e Kosovës po përdor forcë të tepruar dhe u bëri thirrje organizatave ndërkombëtare dhe misioneve diplomatike që "të merren me këtë problem". REL (A2 Televizion)
A2 CNN Livestream
MUND TE LEXONI GJITHASHTU
