Referendumi në veri, Osmani: Kosova plotësoi kushtet e BE, të hiqen masat e padrejta menjëherë

Nga A2 CNN
21 Prill 2024, 20:08 | Politikë

Referendumi në veri, Osmani: Kosova plotësoi kushtet e BE, të

Menjëherë pas mbylljes së kutive të votimit në komunat veriore, aty ku u mbajt referendumi për largimin ose jo të 4 kryetarëve, ka reaguar menjëherë presidentja e Kosovës, Vjosa Osmani.

Në deklaratën e saj, Osmani tha se Kosova u dha qytetarëve të komunave të veriut mundësinë që t’i largojnë kryetarët aktual dhe t’i zgjedhin kryetarët e rinj. Ndërkohë, ajo theksoi se Serbia kreu ndërhyrje të paligjshme në një proces zgjedhor të një shteti tjetër.

“Kosova i dha qytetarëve të komunave të veriut mundësinë që t'i largojnë kryetarët aktual dhe t'i zgjedhin kryetarët e rinj. Qytetarët në masë të madhe nuk e shfrytëzuan këtë mundësi. Për fat të keq, kjo kryesisht ndodhi për shkak të presionit të Beogradit, të ekzekutuar nga Lista Serbe dhe strukturat ilegale kriminale. Edhe njëherë, Serbia kreu ndërhyrje të paligjshme në një proces zgjedhor të një shteti tjetër. Edhe njëherë, Vuçiçi shkeli fjalën që ua kishte dhënë partnerëve ndërkombëtarë.

Por, Kosova sërish dëshmoi maturi, organizim e respektim të plotë të ligjeve e kushtetutës, duke ju ofruar të gjitha komuniteteve, pa dallim, mundësinë që ata të zgjedhin vetë se kush dëshirojnë t'i përfaqësojë. E falënderoj Komisionin Qendror të Zgjedhjeve, institucionet tona të sigurisë, si dhe partnerët tanë për punën, përkushtimin dhe bashkëpunimin”.

Në fund të deklaratës, Vjosa Osmani thekson se, “me organizimin e procesit të sotëm, Kosova i ka plotësuar të gjitha kushtet e kërkuara nga BE-ja. Masat e padrejta kundër Kosovës duhet të hiqen menjëherë”.

 

A2 CNN Livestream

Ditari nga Denisa Pasholli