Si po përdoret inteligjenca artificiale nga bizneset në Shqipëri?

Inteligjenca Artificiale po shënon transformimin më të madh teknologjik, por edhe njerëzor të kohëve tona. Një mori detyrash, nevojash dhe problemesh po zgjidhen në mënyrë të paimagjinueshme dhe në kohë rekord. Por siç është i madh potenciali i kësaj teknologjie, po aq të shumta janë dhe risqet. Por çfarë është Inteligjenca Artificiale?

Është një lloj inteligjence kompjuterike, e cila përfshin aftësinë për të mësuar, përllogaritur, formuluar përfundime dhe ndërmarrë veprime.

Por teksa gjithmonë e më shumë po flitet për inteligjencën artificiale dhe përdorimin e saj në shumë procese, sa është vlera e tregut? Për çfarë shifrash bëhet fjalë?

Këtë vit, vlera e tregut botëror për Inteligjencën Artificiale pritet të arrijë në 200 miliardë dollar, ndërsa të kapërcejë në mbi 1 trilion dollar në dekadën e ardhshme. Sipas të dhënave, 80% e kompanive në botë e përdorin aktualisht Inteligjencën Artificiale në punën e tyre. Cilat janë disa nga këto kompani?

Ndër më kryesoret dhe më të mëdhatë në nivel global përmendim Google; Amazon; Microsoft; Tesla; Apple; Facebook (Meta) etj. Këto kompani e përdorin Inteligjencën Artificiale për një sërë funksionesh që përfshijnë: përmirësimin e eksperiencës së klientit, automatizimin e proceseve të brendshme, zhvillimin e teknologjive autonome, avancimin e analizave të mëdha të të dhënave etj.

Me një peshë të tillë në funksionimin e bizneseve, Inteligjenca Artificiale do të ndikojë në rritjen e ndjeshme të ekonomisë botërore.

PBB-ja botërore do të jetë 14% më e lartë në vitin 2030 si rezultat i Inteligjencës Artificiale ose 15.7 trilionë dollarë. Fitimet do të ndihen më shumë në Kinë dhe në Amerikën e Veriut, rajone që  përfaqësojnë thuajse 70% të ndikimit ekonomik botëror të Inteligjencës Artificiale.

Por përdorimi i Inteligjencës Artificiale po jep ndikim të konsiderueshëm edhe në tregun e punës, duke pasur parasysh se shumë procese në kompani të sektorëve të ndryshëm po kryhen me ndihmën e kësaj teknologjie, duke shkurtuar kështu vendet e punës.

  (A2 Televizion)