Anëtari socialist i Këshillit Bashkiak të Tiranës, Alfred Muharremi, ka reaguar pas njoftimit të deputetes së Partisë Socialiste për Qarkun e Shkodrës, Marjana Koçeku, se do të vijojë mandatin si deputete e pavarur.
Në një postim në rrjetet sociale, Muharremi shprehet se e vlerëson vendimin e saj, por thekson se është e vështirë të injorohet fakti se kauzat që ajo përmend sot kanë qenë prezente edhe më herët, gjatë kohës që ishte pjesë e Partisë Socialiste.
Ai shkruan se nëse një deputet nuk përfaqëson më forcën politike me të cilën është zgjedhur, atëherë duhet të dorëzojë mandatin, duke theksuar se mandati nuk është pronë personale, por besim i dhënë nga votuesit dhe partia, shkruan A2CNN.
Postimi i plotë:
E vlerësoj vendimin e znj. Koçeku për t’iu bashkuar një kauze që sot ka zgjedhur ta quajë edhe të sajën.
Megjithatë, është e vështirë të mos vëresh se të gjitha ato kauza që sot i zbulon me pasion kanë qenë aty edhe dje, edhe pardje, madje edhe ditën kur ajo pranoi të bëhej pjesë e Partia Socialiste e Shqipërisë si deputete e sigurt në një nga zonat më të vështira politike të PS.
Kur kauzat kërkonin betejë parlamentare, ajo kishte e ka mandat, zë, karton dhe mikrofon.
Sot, pasi ka shijuar privilegjet e përfaqësimit, zgjedh të largohet duke u sjellë sikur sapo ka zbuluar realitetin.
Nëse beson se nuk përfaqëson më Partinë Socialiste, atëherë akti politik nuk mbaron te dorëzimi i teserës (që nuk e di nëse e ka) por tek dorëzimin e mandatit.
Mandati nuk është valixhe personale që merret me vete sa herë ndryshon destinacioni apo mendimet e adoleshencës politike.
Ai është besim i dhënë nga një komunitet, nga një ekip dhe nga një forcë politike si Shkodra ku socialistët aty kanë bërë beteja që ajo të jetë në Kuvend.
Ndaj e dashur Marian, suksese paç, por dorëzo mandatin!
Të tjerat pastaj, do të fluturojnë si flamingot.
Disa drejt horizontit, disa drejt kamerave.
Koha do të tregojë se ku do të ulen.
#VetëmPërpara me PS për Shqipërin Europiane (A2 Televizion)
A2 CNN Livestream
MUND TE LEXONI GJITHASHTU
