Marrëveshja me Italinë, Berisha: Asnjë lloj firme e Ramës nuk ka vlerë, është në hetim ndërkombëtar

Nga A2 CNN
7 Nëntor 2023, 11:16 | Politikë

“Firma e Edi Ramës nuk ka asnjë lloj vlere, pasi ai është në hetim ndërkombëtar.” Ka qenë ky reagimi i Sali Berishës për marrëveshjen që Shqipëria bëri me Italinë për pritjen e refugjatëve të vendit fqinj.

Në një deklaratë nga Kryesia e Kuvendit, ku Rithemelimi pritet të mbajë mbledhjen e Grupit Parlamentar, Berisha akuzoi kryeministrin Edi Rama se marrëveshjen me Italinë e ka bërë ndër të tjera, për të ushqyer, siç u shpreh ai, “bandat e tij me trafiqe të shumëllojta njerëzore.”

“Shpreh respektin tim për kryeministren e Italisë. Por, firma e Edi Ramës në atë marrëveshje është e pavlefshme. Sepse ai është kryeministër në hetime ndërkombëtare dhe është i gatshëm të firmosë çdo gjë për të lehtësuar veten e tij nga një hetim ndërkombëtar i pashpresë. Asnjë lloj firme e tij, nuk ka më vlerë. Shqipëria ka me Italinë një marrëveshje, firmosur me Napolitanon, kur ramë dakord që çdo emigrant, i vendeve të tjera, që kalon nga Shqipëria në Itali, të kthehet në Shqipëri për t’u nisur në vendin e tij.”

Po ashtu, kreu i Rithemelimit u citoi fqinjëve italianë statistikat e Eurostat, sipas të cilave që nga 2014-20221, nga vendi largohen çdo vit më shumë se 100 mijë shqiptarë për në Itali, Greqi dhe në hapësirën e Shengenit.

Sa i përket zhvillimeve të djeshme, kur deputetëve të përjashtuar të opozitës iu ndalua nga garda hyrja në Kryesisë e Kuvendit, Berisha i komentoi si "akti më i turpshëm në historinë e një Parlamenti".

Kreu i Rithemelimit premtoi zhvillime të tjera gjatë ditës së sotme.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Loneta Progni