Mbyllja e venddepozitimit të Porto Romanos, për të vijuar me zbatimin e projektit të Eko Parkut, ka krijuar kolaps në menaxhimin e mbetjeve urbane që gjenerohen në Bashkinë e Durrësit.
Fillimisht, bashkia gjeti si zgjidhje provizore depozitimin e tyre në vendgrumbullimin e mbetjeve në Sukth, e më pas në Manëz, por në të dyja këto pika ka hasur në rezistencën e banorëve të zonës.
Banorët e Njësisë Administrative në Manëz kanë protestuar këtë të diel për t’i kërkuar bashkisë që të ndalojë këtë masakër mjedisore që po i bëhet zonës së tyre, që përveç hedhjes së mbetjeve fare pranë banesave të tyre, digjen po aty, duke krijuar ndotje të madhe për mjedisin por dhe ujin e pijshëm dhe atë vaditës, që përdorin banorët në sektorin e bujqësisë.
Ambientalisti, Sazan Guri, i është bashkuar rezistencës së banorëve të Manzës, ndërsa ka pohuar se kjo situatë nuk mund të konsiderohet zgjidhje nga ana e Bashkisë Durrës.
Burime pranë Bashkisë Durrës bëjnë më dije se procesi i përpunimit të mbetjeve përkohësisht mbetet pezull, për shkak të mungesë së një vendi të përcaktuar, deri në një vendim nga ana e qeverisë qendrore. Deri atëherë, në rrugët e qytetit turistik më të madh në vend, mbetjet do të jenë prezente në çdo hapësirë publike. (A2 Televizion)
A2 CNN Livestream
MUND TE LEXONI GJITHASHTU
