Sondazh: Çfarë ju pengon për t'u ushqyer shëndetshëm?
  • Çmimet e larta 67%
  • Mungesa e kohës 22%
  • Mungesë motivimi 0%
  • Lodhja fizike 11%

Fermerët grekë paralajmërojnë përshkallëzim të protestave dhe bllokim të rrugëve deri në Athinë

Nga A2 CNN
6 Shkurt 2024, 09:45 | Ballkani

Fermerët grekë paralajmërojnë përshkallëzim

Në orën 12 të mesditës së sotme, përfaqësues të fermerëve, nga çdo cep i vendit, janë mbledhur në Nikaia të Larisës. Është koha kur do të nisë mbledhja e planifikuar mbarëkombëtare, në të cilën fermerët do të marrin vendimet përfundimtare për vazhdimin e protestave të tyre.

E ndërsa fermerët e kanë bërë të qartë se do të ashpërsojnë qëndrimin e tyre, duke përshkallëzuar protestat e tyre, kryeministri Kyriakos Mitsotakis lë të hapur “dritaren” për një takim me ta.

Në propozimet për takimin vendimtar të sotëm, fermerët planifikojnë të vazhdojnë duke bllokuar rrugët nacionale dhe Istmusin e Korinthit, duke zbritur në Athinë me traktorë dhe një demonstrim jashtë Parlamentit, mbylljen e doganave (traktorët tashmë janë të rreshtuar në stacionin kufitar të Nikit, në Follorinë), por edhe “pushtime” për aksione me makineri bujqësore në qendrat e qyteteve më të mëdha të vendit.

“Ne do të vendosim bashkërisht për veprimet tona, si do ta trajtojmë situatën pas deklaratave të kryeministrit që nuk na kënaqin. Prandaj vazhdojmë me një propozim për të përshkallëzuar protestat, për të dalë në rrugën nacionale me traktorë”, tha përfaqësuesi i fermerëve të Larisës, Rizos Maroudas.

Ndërsa përfaqësuesi i Kooperativës Bujqësore të Larisës, Christos Sidiropoulos, “premtoi” se do të shihnim imazhe të ngjashme me ato të demonstratave të fermerëve në Gjermani, Francë dhe Itali.

“Kërkesat që ne pretendojmë në çdo prefekturë janë të përmbledhura në një dhe të vetmen kërkesë: Ne kërkojmë mbijetesën tonë si fermerë, të qëndrojmë në fshatrat tona”, thotë Komiteti Panhelen i Blloqeve.

Kërkesat kryesore të fermerëve përfshijnë subvencione, uljen e TVSH-së për vajin bujqësor, energjinë elektrike, plehrat dhe furnizimet, si dhe përcaktimin e qartë të kompensimeve që do të marrin, ndryshimin e PPB, etj.

Megjithatë, kryeministri duke folur për gazetarët gjatë prezantimit të librit nga drejtori i zyrës së tij të shtypit, Dimitris Tsiodra, nuk përjashtoi një takim me ta, duke thënë se pret që ata të marrin vendimet më parë.

Më herët, në fjalën e tij ai i kishte dërguar një mesazh botës së bujqësisë, duke folur për CAP-në dhe duke theksuar se qeveria negocioi fort në Bruksel, duke arritur të mbajë të njëjtat burime, ndryshe nga vendet e tjera që u reduktuan: “Unë personalisht e bëra këtë negociatë”.

Ishte PPE ajo që ia doli dhe vendosi disa barriera ndaj kërkesave dhe propozimeve ndonjëherë të tepruara të të gjelbërve dhe socialistëve. Për të gjitha këto, fermerët evropianë po protestojnë në masë të madhe. Tranzicioni i gjelbër është i domosdoshëm, por duhet bërë me kujdes”, tha ndër të tjera Kyriakos Mitsotakis.

A2 CNN Livestream

Ditari nga Denisa Pasholli