Presidenti amerikan Donald Trump ka analizuar mundësinë e kthimit në një luftë të plotë me Iranin. Këto fakte janë nxjerrë nga transkriptet e bisedave ditët e fundit me Sekretarin e Mbrojtjes Pete Hegseth dhe Kryetarin e Shtabit të Përbashkët të Ushtrisë, Gjeneralin Dan Caine, mbi sulme të tjera, por ka vendosur të vazhdojë me bisedimet diplomatike për momentin, thekson Wall Street Journal.
Bisedat janë përqendruar nëse SHBA-të duhet të braktisin negociatat dhe të rifillojnë sulmet në shkallë të plotë ndaj Iranit, thanë zyrtarët, një veprim që disa prej tyre e përshkruajnë si "përfundim të punës". Ndërsa nuk ka marrë një vendim përfundimtar, Trump u ka thënë ndihmësve se beson se një raund tjetër sulmesh në shkallë të plotë mund të prishë diplomacinë dhe të dëmtojë shanset e Uashingtonit për të çmontuar përfundimisht programin bërthamor të Iranit.
Trump u ka thënë gjithashtu ndihmësve të tij se është mirë nëse negociatat me Teheranin kalojnë afatin e 18 gushtit për një marrëveshje bërthamore, thanë zyrtarët, një vendim që u jep bisedimeve më shumë kohë për të funksionuar. Ndërkohë, presidenti tha se aktualisht është i kënaqur me urdhërimin e sulmeve të njëhershme ndaj Iranit kur ky i fundit shkel " memorandumin e mirëkuptimit ", i cili shkaktoi luftime të ashpra gjatë fundjavës që minuan një armëpushim të brishtë të arritur dy javë më parë.
Informimet e Pentagonit mbi opsionet ushtarake të një presidenti në një konflikt nuk janë të pazakonta, me Trump që mban rregullisht takime formale dhe të improvizuara mbi Iranin. Por diskutimet e fundit sugjerojnë se ai po kërkon mënyra për të thyer bllokimin me Teheranin dhe ende nuk e ka përjashtuar një rikthim në luftime. Rifillimi i konfliktit, pranojnë disa zyrtarë, do të ishte një pranim i heshtur se marrëveshja shumë e reklamuar me Iranin dështoi.
Publikisht, Trump thotë se bisedimet po kanë sukses dhe se ai mban opsionet ushtarake në rast se ato dështojnë. “Ata po bien dakord për gjithçka që dua unë, dhe duhet ta bëjnë”, u tha ai gazetarëve javën e kaluar. “Përndryshe, ne thjesht kthehemi dhe bëjmë atë që duhet të bëjmë.”
Një zyrtar i Shtëpisë së Bardhë tha se preferenca e Trump është gjithmonë diplomacia dhe se iranianët do të ishin të mençur të bënin një marrëveshje të mirë me SHBA-në. Zëdhënësit e Hegseth dhe Caine nuk pranuan të komentonin për këtë artikull.
Në një intervistë të martën në Fox News, zëvendëspresidenti JD Vance tha se "ajo që na ka thënë presidenti është të punojmë me problemin, të shohim se ku do të çojnë negociatat. Dhe nëse kjo nuk çon në një zgjidhje të suksesshme nga ana diplomatike, ne ende kemi shumë mundësi opsionale dhe prapë kemi arritur shumë për popullin amerikan".
Zyrtarët dhe analistët thonë se SHBA-të dhe Irani kanë më shumë se një javë që kanë filluar negociatat që kur kanë rënë dakord për 60 ditë bisedimesh. Një pikë kyçe mosmarrëveshjeje është këmbëngulja e Iranit për të ngarkuar miliarda dollarë tarifa shërbimi për anijet që kalojnë nëpër Ngushticën e Hormuzit. Ndërkohë, SHBA-të thonë se rruga ujore duhet të jetë e lirë për t’u kaluar, siç ishte para se të fillonte lufta. Teherani gjithashtu thotë se nuk do të pranojë kufizime të rrepta në punën e tij bërthamore, pavarësisht këmbënguljes së Trump se Irani tashmë e ka bërë këtë angazhim. (A2 Televizion)
A2 CNN Livestream
MUND TE LEXONI GJITHASHTU
