Takimi i Brukselit për asociacionin, skepticizëm për rezultate konkrete mes Bislimit dhe Petkoviç

Të enjten rikthehet dialogu mes Kosovës dhe Serbisë, rreth dy muaj pas agresionit serb në Banjskë.

Kryenegociatorët Besnik Bilsimi dhe Petar Petkoviç do të jenë përballë njëri-tjetrin në Bruksel për të diskutuar hapat e ardhshme në normalizimin e marrëdhënieve dhe draft-statutin europian për Asociacionin.

Por në Prishtinë ka skepticizëm për një progres të mundshëm në këtë takim. Nga Lidhja Demokratike e Kosovës thanë për Kosova Press se e kanë të pamundur të dalin me një qëndrim për asociacionin pasi ende nuk e kanë parë draft-statutin europian.

“Ne e dina se Serbia nuk dëshiron t’i zbatojë marrëveshjet por ish dashur nga ana e ndërkombëtarëve që të bindin Serbinë. Po ashtu me implementimin e marrëveshjeve të hiqen masat pasi kemi humbur shumë nga ana financiare, sidomos në projektet IPA”, tha deputetja Krasniqi.

Skepticizëm për takimin e kryenegociatorëve shprehin edhe njohësit e çështjes së dialogut Kosovë-Serbi.  

“Lehtësuesit e këtyre negociatave dhe ata që e mbështesin këtë proces duhet të jenë sy hapur që pala që nuk është konstruktive në këtë dialog të pengohet në procesin e anëtarësimit apo qoftë edhe në zhvillimin ekonomik apo pozicionin ndërkombëtar që ka, në rastin tonë po flasim për Serbinë”, u shpreh analisti Dorajet Imeri

Takimi në Bruksel vjen pas vizitave që zhvilloi emisari i posaçëm i BE-së për dialogun, Miroslav Lajçak, fillimisht në Kosovë dhe më pas edhe në Serbi.  (A2 Televizion)