Nga Tropoja në Shkodër, bashkë me Tiranën, Durrësin, Fierin e veçanërisht Vlorën, Gjirokastrën e Sarandën... në thuajse 28 mijë kilometrat katrorë të vendit... të gjithë po vuajnë nga temperaturat e larta.
“Gjëja e parë që duhet të dimë është fakti se trupi i njeriut është i përbërë nga 60 për qind ujë, ndërsa truri plot 90 për qind. Kur ju humbni ujë nga trupi juaj duke u djersitur apo përmes frymëmarrjes, ndikimi është i drejtpërdrejtë te sistemi kardiovaskular, veshkat dhe gjithashtu shëndeti mendor. Temperaturat e larta sjellin turbullira dhe lodhje deri në pamundësi për të qëndruar në këmbë”, thotë për A2 CNN Geraldine McWeeney, përfaqësuesja e OBSH-së në Shqipëri.
Një në 10 telefonata drejt Urgjencës Kombëtare sot lidhet me problemet e shkaktuara nga i nxehti, veçanërisht te fëmijët dhe të moshuarit. “Grupmoshat më të rrezikuara dhe më të prekura nga kjo janë kryesisht fëmijët e vegjël dhe të moshuarit. Fëmijët pasi sistemi i tyre imunitar nuk është i zhvilluar mjaftueshëm, dhe të moshuarit pasi kanë një sistem imunitar kryesisht të dobët dhe gjithashtu kanë sëmundje të tjera bashkëshoqëruese”, thotë McWeeney.
Një sërë agjencishë ndërkombëtare, përfshirë NASA-n po i lidhin temperaturat e larta me ndryshimet klimatike duke paralajmëruar ndërkohë se kjo mund të jetë vera më e freskët në raport me ato që pritet të vijnë.
“Vetëm pak javë më parë, Organizata Botërore e Shëndetësisë zhvilloi një takim me Ministritë e Shëndetësisë dhe Mjedisit të vendeve Europiane. Në fund të saj u nënshkrua ajo që njihet si “Deklarata e Budapestit”. Kjo deklaratë mbështet angazhimin në agjendën e klimës dhe shëndetit për të shmangur problemet që shkaktohen nga i nxehti”, thotë McWeeney.
Sipas matjeve të meteorologëve, e marta ka regjistruar temperaturën më të lartë për këtë vit, me 43 gradë. I nxehti afrikan që ka pushtuar vendin prej më se dy javësh pritet t’ia lërë vendin temperaturave disi më të ulëta në mesjavë. (A2 Televizion)
A2 CNN Livestream
MUND TE LEXONI GJITHASHTU
