Presidenti i Serbisë, Aleksandar Vuçiç, i ka kërkuar homologut francez, Emmanuel Macron, gjatë një bisede telefonike, se çështjet e rëndësishme për Serbinë, që ndërlidhen me Kosovën, të vazhdojnë të zënë një vend të rëndësishëm në agjendën e Bashkimit Evropian.
Vuçiç tha se ato duhet të jenë pjesë e agjendës “me një angazhim të fortë diplomatik, i cili synon realizimin përfundimtar të Marrëveshjes së Brukselit dhe me themelimin e Asociacionit të komunave me shumicë serbe, si bazë për ndërtimin e paqes së qëndrueshme dhe garantimin e sigurisë për popullin serb”.
Lideri serb theksoi se me presidentin francez ka diskutuar edhe për sigurinë rajonale dhe stabilitetin ekonomik.
Serbia dhe Kosova zhvillojnë dialog për normalizimin e marrëdhënieve, nën ndërmjetësimin e BE-së, prej vitit 2011.
Me 26 qershor në Bruksel, pas një ndërprerje 9 mujore, do të zhvillohet takimi i radhës mes kryeministrit Albin Kurti dhe presidentit Vuçiç. (A2 Televizion)
A2 CNN Livestream
MUND TE LEXONI GJITHASHTU
