Një zëvendësministër rus i Mbrojtjes është arrestuar nën dyshimin për marrje ryshfeti, ka thënë agjencia më e lartë e zbatimit të ligjit në vend, një veprim i rrallë ky në mes të ofensivës në Ukrainë.
Komiteti hetimor raportoi të martën për ndalimin e Timur Ivanovit, pa dhënë asnjë detaj për akuzat kundër tij, duke thënë vetëm që ai dyshohet se ka marrë ryshfet "në shkallë të gjerë", çka përbën një vepër penale të dënueshme deri në 15 vjet burg.
Zëdhënësi i Kremlinit, Dmitry Peskov, i cituar nga agjencitë ruse të lajmeve, tha se një raport mbi ndalimin e Ivanov i ishte paraqitur presidentit Vladimir Putin. Ministri i Mbrojtjes, Sergei Shoigu, ishte informuar paraprakisht për ndalimin e tij, tha ai.
48-vjeçari Ivanov, një nga 12 zëvendësministrat e Mbrojtjes, u sanksionua nga SHBA-ja dhe BE-ja në vitin 2022, pasi Rusia pushtoi Ukrainën. Ai ka punuar në kompani që merren me karburant dhe energji, si dhe në qeverinë rajonale të Moskës, përpara se të bashkohej me Ministrinë e Mbrojtjes në vitin 2010. Ai u bë zëvendësministër në vitin 2016.
Revista Forbes e ka renditur atë si një nga njerëzit më të pasur në strukturat e sigurisë ruse. Sipas lajmeve nga agjencitë ruse, Ivanov, ishte zyrtari më i lartë rus që u përball me akuza të tilla që kur Moska filloi pushtimin e saj në Ukrainë në shkurt 2022.
Ai ishte subjekt i një hetimi të botuar në vitin 2022 nga Fondacioni i ndaluar Kundër Korrupsionit, krijuar nga lideri i ndjerë i opozitës, Alexei Navalny. (A2 Televizion)
A2 CNN Livestream
MUND TE LEXONI GJITHASHTU
