Bilanci i viktimave nga zjarri që shpërtheu në një vendpushim skish në veriperëndim të Turqisë është rritur, duke shkuar në 66 persona të pajetë dhe 51 të tjerë të plagosur.
Ministri i Brendshëm Ali Yerlikaya tha se Zjarri shpërtheu gjatë natës në restorantin e hotelit në vendpushimin e Kartalkaya në provincën Bolu.
“Tragjikisht, numri i përgjithshëm i të vdekurve pas incidentit është rritur në 66. Dhimbja jonë është e madhe", tha Yerlikaya nga resorti Kartalkaya.
Sipas guvernatorit të Bolu, flakët u shfaqën fillimisht në katin e katërt të hotelit 11-katësh rreth orës 3:30 të mëngjesit.
Imazhet televizive treguan çatinë dhe katet e fundit të hotelit në flakë, me njerëzit që përpiqeshin të zbrisnin nga dhomat e tyre duke përdorur çarçafë për t'i shpëtuar zjarrit.
Të tjerë u hodhën nga dritaret e hotelit në një përpjekje të dëshpëruar për të shpëtuar nga nga flakët.
Autoritetet turke arrestuan të martën katër të dyshuar, përfshirë pronarin e hotelit. “Si pjesë e një hetimi të udhëhequr nga gjashtë prokurorë, katër persona përfshirë pronarin e hotelit u arrestuan”, tha ministri i Drejtësisë Yilmaz Tunc në X.
Resorti që u përfshi nga flakët ndodhet në majë të një vargu malor rreth 170 kilometra në veriperëndim të kryeqytetit Ankara. Një pjesë e hotelit mbështetet në një shkëmb, gjë që e bëri më të vështirë për zjarrfikësit të shuajnë flakët.
Në kohën e shpërthimit të flakëve, 237 persona ishin duke qëndruar në hotel, sipas raporteve lokale. Rreth 30 kamionë zjarrfikës dhe 28 ambulanca shkuan në vendngjarje. (A2 Televizion)
A2 CNN Livestream
MUND TE LEXONI GJITHASHTU
