Tanke, dronë dhe helikopterë, Izraeli mësyn sërish në Gaza

Forcat e Armatosura të Izraelit kanë realizuar inkursionin e dytë të gjerë në territorin e Gazës, gjatë mbrëmjes.

Forcat izraelite, në një video të publikuar, mëngjesin e së premtes, nga zëdhënësi i IDF shihen teksa i drejtohen objektivit të aksionit, që ishte lagjja Shuja'iyya në Gazën lindore.

Duke konfirmuar vlerësimin se bastisjet e kufizuara mund të ishin një provë për një pushtim tokësor, në postimin e tij në platformën X, Daniel Hagari përshkruan se në operacionin në Gaza u përfshinë forcat e këmbësorisë, të blinduara me mbështetjen ajrore të helikopterëve dhe dronëve.

Kjo ndërhyrje e njësive të këmbësorisë ka pasur po ashtu mbështetje të garantuar ajrore me helikopterë dhe drone.

Qëllimi i operacionit, sipas përfaqësuesit izraelit, ishin depot e armëve të Hamasit, vendet e lëshimit të raketave dhe predhave antitank.

“Forcat u larguan nga zona në fund të misionit dhe nuk ka viktima në radhët tona”, shtoi zëdhënësi i IDF.

Daniel Hagari publikoi edhe video të njoftimeve të komandantit të Divizionit 36 dhe të pranisë në qendrën e operacioneve të kreut të Komandës Jugore dhe shefit të Forcave Ajrore izraelite. (A2 Televizion)