Presidenti i Shteteve të Bashkuara, Donald Trump, ka vendosur të pezullojë përkohësisht planet për një përshkallëzim të operacioneve ushtarake amerikane kundër Iranit, mes shqetësimeve në rritje për kapacitetet mbrojtëse të SHBA-së dhe pasojat që një konflikt i gjerë mund të ketë në rajon.
Sipas zyrtarëve të administratës amerikane, një nga arsyet kryesore të këtij vendimi është frika se një luftë më intensive do të shteronte rezervat e raketave mbrojtëse Patriot dhe municioneve të tjera të mbrojtjes ajrore, të dislokuara nga Pentagoni në Lindjen e Mesme.
Presidenti Trump dhe këshilltarët e tij të sigurisë kombëtare vlerësojnë gjithashtu se një përshkallëzim i konfliktit mund të destabilizojë rajonin, të dëmtojë marrëdhëniet me aleatët arabë të Gjirit, të rrisë çmimet globale të energjisë dhe të shkaktojë një valë të re refugjatësh.
Vendimi u mor pas një takimi të zhvilluar në Shtëpinë e Bardhë, ku në fokus të diskutimeve ishin rezervat në rënie të sistemeve Patriot dhe kapacitetet mbrojtëse të forcave amerikane të vendosura në rajon.
Shqetësimet u shtuan pas sulmit të javës së kaluar në Jordani, ku tre ushtarë amerikanë humbën jetën pasi një raketë balistike depërtoi mbrojtjen ajrore gjatë një sulmi me raketa dhe dronë, për të cilin Uashingtoni fajëson Iranin.
Megjithatë, Shefi i Shtabit të Përbashkët të Forcave të Armatosura të SHBA-së, gjenerali Dan Caine, ka deklaruar se rifillimi i operacioneve ushtarake në shkallë të gjerë kundër Iranit mbetet një opsion i mundshëm, nëse zhvillimet në terren e bëjnë të domosdoshëm një vendim të tillë. (A2 Televizion)
A2 CNN Livestream
MUND TE LEXONI GJITHASHTU
