Sondazh: Çfarë ju pengon për t'u ushqyer shëndetshëm?
  • Çmimet e larta 73%
  • Mungesa e kohës 18%
  • Mungesë motivimi 9%
  • Lodhja fizike 0%

Zelensky zbret në frontin e luftës, rruga për në Adviivka është e mbushur me ushtarë të vrarë

Nga Xhevahir Qardaku
20 Shkurt 2024, 15:42 | Bota

Qielli dhe toka e Ukrainës nuk gjen qetësi. Shpërthime janë raportuar në qytetin e Zaporizhias, Kremençuk dhe Dnipro. Ka pasur dhe sulme të tjera, ndërsa në terren vijon përballja e armatosur mes ushtrive. Në orët e fundit janë rrëzuar 23 dronë të lëshuar nga Rusia në drejtim të 7 rajoneve. Por lufta ka kaluar edhe në anën tjetër.

Moska pretendon se rrëzoi dronë ukrainas në Briansk dhe Kaluga. Adviivka, që ra në duart e ushtrisë ruse pas rezistencës disamujore, mbetet zona më e nxehtë e luftimeve.

“Braktis 300 ushtarët e plagosur dhe digj gjithçka”, është urdhëruar një ushtar ukrainas në momentet e fundit të tërheqjes. Disa orë pas ngritjes së flamurit rus në Adviivka, historitë horror nisën të shfaqeshin. Rrugët që të çojnë në këtë qytet, zonë e cila është përfshirë në konflikt që nga vitit 2014, janë të mbushura me ushtarë ukrainas të vrarë në betejë.

Humbja ka detyruar presidentin Volodymyr Zelensky që të zbresë në sheshin e luftës, duke shkuar në një rajon verilindor, jo shumë larg Donjeckut dhe Luhanskut. Ai pranon se situata në terren është shumë e vështirë.

 “Tani është një situatë jashtëzakonisht e vështirë në disa pjesë të vijës së frontit, pikërisht aty ku trupat ruse kanë përqendruar rezervat maksimale. Ata po përfitojnë nga vonesat në ndihmën për Ukrainën dhe kjo është një çështje shumë e ndjeshme. Ata përfitojnë nga mungesa e artilerisë. Kemi nevojë që të fortifikojmë vijën e parë të mbrojtjes ajrore dhe për një rreze më të gjatë të armëve tona”, tha Zelensky.

Pas kërkesave të vazhdueshme nga Kievi, administrata amerikane po punon për të dërguar në Ukrainë raketa të reja balistike, tepër të fuqishme, që operojnë me një rreze të gjatë. Këtë e raportojnë mediat në SHBA që citojnë zyrtarë të lartë të qeverisë Biden.

Ndërkohë, nga Suedia vjen paketa më e madhe e ndihmës për Ukrainën. 682 milionë dollarë do të dërgohen nga vendi nordik për të mundësuar fuqizimin ushtarak të Kievit, para të cilat do të përdoren për blerje armësh dhe për transferimin e pajisjeve të ndryshme luftuese.

A2 CNN Livestream

Ditari nga Erion Dushi