Presidentja Vjosa Osmani priti në një takim një delegacion të Asamblesë Parlamentare të Këshillit të Evropës. Misioni i tyre në Kosovë do të jetë për vëzhgimin e zgjedhjeve të përgjithshme parlamentare të 9 shkurtit.
Presidentja Osmani theksoi se zgjedhjet që do të mbahen me ligjin e ri do të përbëjnë një hap të rëndësishëm në përmirësimin e proceseve demokratike në vend.
“Presidentja Osmani, ka potencuar se Republika e Kosovës mbetet e përkushtuar për t’u anëtarësuar në Këshillin e Evropës, ndaj do të vazhdojë ta fuqizojë mbrojtjen e të drejtave të njeriut dhe fuqizimin e sundimit të ligjit”, thuhet në reagimin e Presidencës së Kosovës.
Delegacioni në fjalë është pritur edhe nga kryetari i Kuvendit, Glauk Konjufca. Në mesazhin e tij, kryeparlamentari thotë se në takim u diskutua për zgjedhjet e përgjithshme dhe aspirate për anëtarësim në struktura ndërkombëtare dhe europiane.
“Kryekuvendari Konjufca ritheksoi se Republika e Kosovës mbetet e përkushtuar për t’u anëtarësuar në Këshillin e Evropës, ashtu siç ka qenë dhe vijon të mbetet e angazhuar në ruajtjen dhe zhvillimin e mëtejshëm të demokracisë në vendin tonë, për mbrojtjen e të drejtave të njeriut dhe fuqizimin e sundimit të ligjit”, thuhet në reagimin e Kuvendit të Kosovës.
Misioni vëzhgues nga Asambleja Parlamentare e Këshillit të Evropës është pritur në takim edhe nga kryeministri Albin Kurti. (A2 Televizion)
A2 CNN Livestream
MUND TE LEXONI GJITHASHTU
