Gati 1 milionë euro në më pak se një javë. Kaq para ka fituar Korporata Elektroenergjetike Shqiptare nga shitja e energjisë elektrike si rrjedhojë e mbushjes së hidrocentraleve nga shirat e dendur.
Në total janë eksportuar në vendet e tjera 10 mijë e 790 megavatorë energji vetëm ditën e fundit. Ndërkohë që çmimi me të cilën është shitur energjia ka variuar nga 54 deri në 85 euro për megavator.
Në rikthimin e KESH te eksportet ndikim ka pasur veçanërisht mbushja e Fierzës. Hidrocentrali më i madh në kaskadën e Drinit ka aktualisht 292 metër ujë nga 296 metër që është kuota maksimale.
Situata e mirë hidrike po rezulton në vijimësi nga viti i shkuar. Sasia e energjisë elektrike së prodhuar në vend arriti në gati 8,8 milionë megavat-orë gjatë 2023-shit. Ky është niveli i dytë më i lartë i shënuar në historinë e vendit, pas rekordit të vitit 2021.
Prodhimi më i lartë se konsumi bëri që vendi ta mbyllë vitin e shkuar me një bilanc pozitiv prej më shumë se 900 mijë megavat-orë energji tepricë. Ndërkohë qeveria ka shpallur si objektiv që me anë të diversifikimit të burimeve të prodhimit, Shqipëria të kthehet në vend eksportues neto në vitin 2030. (A2 Televizion)
A2 CNN Livestream
MUND TE LEXONI GJITHASHTU
