Shpërthim i fuqishëm në Tiranë, i vendoset tritol lokalit

Nga Julian Kasapi
28 Nëntor 2023, 09:11 | Kronikë

Një shpërthim tritoli dëmtoi ambientet e një biznesi orët e para të mëngjesit në Tiranë. Ngjarja ndodhi në rrugën Sali Butka ndërsa nga shpërthimi pati vetëm dëme material.

Lokali rezulton në pronësi të një 40-vjeçari, i identifikuar nga policia si Armand Xhaferraj ndërsa tritoli sipas hetuesve është vendosur në derën e jashtme.

Shpërthimi shkaktoi dëme të mëdha dhe në dy biznese ngjitur, një zyrë dhe një biznes me pjesë këmbimi për automjete. Sipas policisë Xhaferraj e ka marrë me qira ambientin të cilin e kishte kthyer në një bar-restorant.

Pas marrjes në pyetje Xhaferraj ka thënë për hetuesit se dyshon se lënda plasëse i është vënë për shkak të një konflikti që ai ka pasur për tokën përballë bizneseve, zonë e cila shërben si parking privat krah pallatit që u përfshi nga flakët pak muaj më parë në Tiranë.

Pas shpërthimit, veç Xhaferrajt policia mori në pyetje dhe rojën e parkimit, i cili gjatë ngjarjes ka qenë në punë turni i tretë.

Vetë lokali ku ka ndodhur shpërthimi nuk ka kamera, por pritet që policia të vëzhgojë kamerat e sigurisë në bizneset pranë që mund të ndihmojnë në identifikimin e autorit.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Loneta Progni