Në takimin me kryesinë e PD në Lezhë, kryedemokrati Sali Berisha është ndalur te çmimet e larta të shportës, të cilat ua kanë vështirësuar edhe më tej jetesën shqiptarëve.
Lideri i opozitës bëri fajtor kryeministrin Edi Rama dhe qeverinë e tij për varfërinë ekstreme. Edi Rama del me tezën se do të marrë mandatin e 4-të, në një kohë kur ka sjellë një rrënim të qenies shqiptare, të cilin nuk e ka regjistruar asnjë pushtim para tij. Ka larguar, për hapësirën e Shengenit, 1 milionë e 99 mijë shqiptarë, gjer dy muaj më parë të vitit 2024. Statistika e Eurostatit.
Po të marrim sa janë larguar në të gjithë botën, unë ju garantoj se, shkojnë mbi 40% të të gjithë popullatës.
Por sigurisht ky është aspekti më dramatik, sepse të humbasësh, 40-45% të kombit në një hark të shkurtër, sa asnjë luftë civile kund në botë, apo luftë globale, kjo është një fatkeqësi e madhe kombëtare.
“Këta që jetojnë këtu ky i ka zhytur në një varfëri lemeritëse, lemeritëse. Me një varfëri në rritje, me të gjithë treguesit. Në kushtet më normale, tregu krijon pasuri e cila shpërndahet, thotë Adam Smith, që nga ajo kohë. Në Shqipëri tregu ka krijuar varfëri në rritje si në asnjë vend tjetër, për shkak të vjedhjeve masive të fondeve dhe pasurive publike”, tha Berisha.
Ai mori si shembull Rumaninë për të treguar se niveli i çmimeve të ushqimeve bazë në Shqipëri është thuajse i barabartë me ato në vendet e BE-së, ku pagat janë shumë herë më të larta.
“E riktheksoj edhe njëherë, në Rumani që nga viti 2013 gjer sot janë 5-fishuar rrogat. Janë 5 herë më të mëdha seç ishin në vitin 2013. Rumania në vitin 2013 e kishte qartësisht të paktën 20% më të ulët rrogën se Shqipëria. Ne e kemi pasur rrogën më të lartë se 6 vende të Ballkanit+Rumaninë dhe Bullgarinë. Dhe ky në mënyrë më të pamëshirë i ngriu rrogat. Dhe tani që i rriti, para disa muajsh sërish jemi të fundit ne, nuk i afrohemi asnjëri prej vendeve të tjera. Jo, se i bllokoi në një kohë kur, nuk po them ti 5-fishonte, por të paktë ti 3-fishonte në 12 vite”, shpjegoi kreu i PD.
Më tej, lideri i selisë blu u ndal tek pensionistët, duke qenë se PD e cilëson si tallje bonusin prej 10 mijë lekë që qeveria shpërndau për fundvit. Berisha tha se një pensionist sot merr të paktën 35% më pak, si fuqi blerëse se në vitin 2013.
“Sepse sot buka, qumështi, është dyfish. Prodhimet bazë bujqësore, janë 2-3 fishuar çmimi, me shifra reale. Sepse sot këto çmime kanë tejkaluar Greqinë, po e po, por kanë tejkaluar Gjermaninë, Italinë. Dhe këtij i duhet të jetojë me 150, 120, ose 180 euro. Duhet të marrë dhe ilaçet, por po mori ilaçet nuk merr një vakt bukë, ose lë pa marrë ilaçet”, sqaroi Berisha.
Më tej ai nënvizoi se Rama dënoi pjesën më të madhe të pensionistëve në vend që jetonte me remitancat, pra paratë që u dërgonin fëmijët e tyre në emigrim, pasi “krijoi narkoeuron këtu”.
“Narkoeuro ua zhvlerësoi remitancat rreth 40%. Rriti çmimet. Pra ka krijuar një situatë që në shumë aspekte tejkalon imagjinatën”, u shpreh Berisha. (A2 Televizion)
A2 CNN Livestream
MUND TE LEXONI GJITHASHTU
