Edhe këtë të mërkurë Sali Berisha vijoi denoncimin lidhur me çështjen e inceneratorëve, duke u fokusuar tek kostot e djegësit të pandërtuar të Tiranës, një aferë që sipas tij do t’i çonte 1 miliard Euro në xhepat e Edi Ramës dhe Erion Veliajt, të cilët i quan përfituesit e vërtetë të skemës.
“Ka vjedhur 17 euro/ton të plehrave të depozituara për 6 vite në fushën e Sharrës, në sipërmarrjen e tyre. Janë zhdukur 130 milionë euro. Në projektin 30-vjeçar, specialistët, ekspertë të pavarur, por edhe të PD, gjejnë se kjo aferë megakorruptive do të gjeneronte për pronarët e saj nga pagesat që merrte nga shteti dhe privatët, nga shitjet e materialeve që grumbullonte, do i aneksonte të paktën 1 miliard euro.”
Pranoi edhe njëherë se ndikimi i parave të inceneratorëve kanë devijuar dhe agjendën e PD në kohën kur drejtohet nga Lulzim Basha dhe i dha meritat për denoncimin e kësaj afere Partisë së Lirisë.
“PD ishte e verbuar nga paratë e inceneratorëve, flamurin duhet ta pranojmë e pati Partia e Lirisë në denoncimet e fuqishme.”
I pyetur për sekuestrimin nga SPAK të disa telefonave të njerëzve pranë deputetes Monika Kryemadhi, Berisha foli për përndjekje politike kundër opozitës.
“Lidhur me Partinë e Lirisë, të gjitha këto janë përndjekje politike e opozitës nga Edi Rama. Çdo akt, se si mund t’i sekuestrohet pa një leje, t’i kontrollohet korrespondenca deputetit pa leje parlamenti, kjo është shkelje përsëri e Kushtetutës.”
Me të njëjtën lente shikon edhe shkresën e SPAK dorëzuar në Kuvend, ku kërkohet autorizimi për arrestimin e tij, por thotë se opozita do të kundërpërgjigjet.
“Kanë kërkuar në mënyrën më të turpshme, përligjen e aktit të tyre antikushtetues. Është përpjekja për të legalizuar ndërtimin pa leje. Opozita do i përgjigjet metë gjitha mjetet e mosbindjes civile të gjithë valës së represionit kundra saj.” (A2 Televizion)