Shqipëria mbylli Kampionatin Kombëtar të Skive 2023, teksa në mënyrë po aq të suksesshme organizoi për herë të parë edhe Kupën Ballkanike.
Gjatë dy ditëve, në Dolomite të Italisë, u zhvilluan disiplinat e Sllallomit dhe Sllallomit Gjigant. Në aktivitetin e organizuar nga Federata Shqiptare e Skive morën pjesë rreth 200 sportistë nga 25 shtete nga e gjithë bota dhe 8 vende të Ballkanit.
Garat ballkanike u dominuan nga skiatorët sllovenë, ku Klemen Kosi për meshkuj fitoi si në Gjigant ashtu dhe në Sllallom. Në garën për femra, ditën e parë në sllalom triumfoi bullgarja Anina Zurbriggen, ndërsa në sllallom gjiant vijoi dominimi i skiatoreve sllovene, me Nika Tomsic që ishte më e shpejta në finish.
Në podium janë ngjitur edhe skiatorët rumunë, por festë kishte edhe për Shqipërinë. Talenti Denni Xhepa u rendit i dyti në Ballkan në disiplinën e Sllallomit Gjiant.
Në kategorinë e përgjithshme, garat janë dominuar nga skiatorët zvicerianë.
Për të katërtin edicion me radhë, Federata Shqiptare e Skive i zhvilloi aktivitetet në zemër të Dolomiteve, në Kronplatz. Mungesa e pistave në Shqipëri dhe infrastruktura perfekte që ofron pjesa e Alpeve e kanë kthyer në traditë zhvillimin e eventeve në veriun e Italisë. (A2 Televizion)
A2 CNN Livestream
MUND TE LEXONI GJITHASHTU
