Kur kanë mbetur dhe disa ditë nga ndeshja e shumëpritur dhe vendimtare për kombëtaren shqiptare me Republikën Çeke, Federata e Futbollit bëri publike dhe programin që do të ndjekin kuqezinjtë.
Trajneri Sylvinho do të bëjë zyrtare listën e futbollistëve të grumbulluar, mesditën e të premtes. Sipas FSHF-së, në orën 12:00, braziliani do të ketë gati emrat e përzgjedhur për ndeshjen me çekët më 12 tetor, si dhe miqësoren me Bullgarinë, 5 ditë më vonë.
Ndërkohë, mëngjesin e të shtunës, Sylvinho do të dalë në konferencën e zakonshme për shtyp ku përveçse do të komentojë zgjedhjet e tij do të tregojë dhe ambiciet që kuqezinjtë kanë.
Sipas raportimeve, një pjesë e madhe e lojtarëve do të mbërrijnë në Tiranë ditën e diel, pasi të përfundojnë dhe ndeshjet në kampionatet që luajnë, ndërsa pjesa e mbetur do t’i bashkohen grupit të hënën kur do të nisin zyrtarisht në orën 17:00 dhe përgatitjet për ndeshjen e rëndësishme.
Aktualisht, Shqipëria pozicionohet e para në grupin E me 10 pikë, dy më shumë se Republika Çeke dhe Moldavia dhe katër larg Polonisë.
Ndeshja me çekët do të luhet më 12 tetor në “Arenën Kombëtare” në Tiranë.
MUND TE LEXONI GJITHASHTU
