Mediu: Brenda opozitës ka njerëz që dashurinë e kanë me gramë dhe përbuzjen e kanë me okë

Nga A2 CNN
23 Maj 2023, 20:20 | Politikë
Mediu: Brenda opozitës ka njerëz që dashurinë e kanë me

Kreu i Partisë Republikane, Fatmir Mediu, i ftuar në “Debat” nga Alba Alishani ka folur në lidhje me situatën në të cilën ndodhet sot opozita shqiptare, referuar edhe rezultatit të arritur në zgjedhjet e fundit të 14 majit.

Mediu nuk ngurroi të vërë gishtin ndaj të dyja PD-ve, që sipas tij duhet të kishin gjetur gjuhën e përbashkët sa i përket kandidatëve të propozuar dhe jo të merreshin me deklarata duke sharë njëri – tjetrin.

Sipas Mediut, ideja për të dalë me një poli më vete, prapë edhe në këto zgjedhje nuk do të kishte funksionuar, ndërsa shtoi se, ka nevojë për një logjikë tjetër politike opozita. Kreu i PR vijoi më tej duke thënë se, opozita fatkeqësisht po shkon drejt një qasjeje me individët, por në fakt ajo duhet të shkojë drejt një qasjeje me idetë.

Z. Andoni e thotë shumë shpesh që Partia Demokratike e ka të mbyllur misionin e saj...

Çështja është që PD debatin e bën rreth individëve, jo rreth racionalitetit të ideve. Ajo që është e para është ideja,  dhe pas saj lidhen njerëzit. Ne kemi nevojë për një identitet politik të qartë.

Në mos gaboj z. Mediu ideja e konfederatave ka qenë një prej propozimeve tuaja në një moment delikat për opozitën. Pse nuk gjeti një lloj suporti?

Po sepse sikurse ka njerëz që duan të bashkohen, ka edhe njerëz që duan të ndahen. Ashtu sikurse ka njerëz që shikojnë përtej hundës së tyre, ka edhe njerëz që shikojnë vetëm xhepin dhe interesin e tyre. Fatkeqësisht brenda opozitës ka njerëz që dashurinë e kanë me gramë dhe përbuzjen e kanë me okë dhe urrejtjen e kanë me tonë.

Z. Mediu për kë po flisni?

Kush ka vesh le ta dëgjojë. Të gjithë ata që urrejnë kolegët e tyre dhe thonë ky bën, ky s’bën, do të thotë që nuk janë në sens të drejt logjik. Politika kërkon të bëjë bashkë atë që është ndryshe. Individët duhet t’i qasen ideve ndryshe për të nxjerrë atë që është racionale, dhe secili sjell një lloj marrëdhënieje dhe sinergji elektorale.

Pra, duket se pakënaqësinë e keni me të dyja palët e Partisë Demokratike?

Ne arritëm në një pikë që mund të vinim të dyja Partitë Demokratike le ta quajmë në një koalicion qoftë edhe me Partinë Republikane, apo me ndonjë forcë tjetër të djathtë, por nuk u pranua. Ishte pikërisht debati i brendshëm dhe nuk është as Enkelejd Aliebaj, as Lul Basha, por e gjithë pjesa tjetër, Jorida Tabaku, Gazment Bardhi, Bledion Nallbati, Saimir Korreshi e të tjerë me radhë, që ishin gati të zgjidhnin një kandidat të vetëm dhe të bënin fushatë të gjithë bashkë. Kjo nuk u pranua sepse ishin këto përplasjet e brendshme. Pra, ajo që unë po them është që, çfarë logjike kishte për të vendosur kandidatë në 12 apo 14 zona për një gjë që nuk vlente, qoftë nga pikëpamja logjike e një partie të madhe, qoftë politike, qoftë edhe elektorale.

https://a2news.com/2023/05/23/mediu-3-hapat-qe-duhet-te-ndjeke-opozita-pas-humbjes-ne-zgjedhjet-e-14-majit/

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Erion Dushi