Hamasi kishte gati një plan për të përdorur dhunën seksuale si armë lufte. Kjo është ajo që ka bërë të ditur një aktiviste dhe avokate izraelite për të drejtat e grave.
Profesoresha Ruth Halperin-Kaddari deklaroi të hënën se ka parë pamje të disa grave në disa lokacione, gjendja e të cilave nuk i la asnjë dyshim se ato ishin përdhunuar.
Reagimet janë të shumta për vonesën e disa organeve të OKB-së për të pranuar pretendimet për mizoritë seksuale të Hamasit më 7 tetor.
Shkalla e dhunës seksuale të kryer nga Hamasi gjatë sulmeve të tetorit nuk është ende e qartë, por policia izraelite thotë se deri më tani ka mbledhur më shumë se 1500 dëshmi nga dëshmitarë dhe mjekë.
Fotografitë dhe pamjet e drejtpërdrejta të transmetuara nga militantët treguan natyrën e tmerrshme të sulmeve në festivalin Supernova.
Një sërë veprimesh barbare nga përdhunimet në grup deri tek gjymtimi seksual i viktimave të vrarë po hetohen nga policia.
Hamasi i mohon këto abuzime. Një zyrtar, Basem Naim, tregoi për The Washington Post se grupi e konsideron "çdo marrëdhënie seksuale ose aktivitet jashtë martesës si plotësisht haram" - të ndaluar nga Islami.
Aktivistët izraelitë për të drejtat e grave dhe ligjorë u kanë bërë thirrje organizatave kryesore ndërkombëtare që të pranojnë publikisht raportet e dhunës me bazë gjinore, përfshirë dhunën seksuale, pas sulmeve të Hamasit.
Profesoresha Halperin-Kaddari, i cila ka qenë për 12 vjet, anëtare e një konvente të OKB-së për diskriminimin ndaj grave, tha se organeve të OKB-së u janë bërë thirrje që të pranojnë krimet kundër njerëzimit që po bëhen nga grupi militant. (A2 Televizion)
A2 CNN Livestream
MUND TE LEXONI GJITHASHTU
