Më pak se dy vite pasi siguroi një fitore bindëse në zgjedhjet e përgjithshme, duke premtuar t’i japë fund kaosit në politikën britanike, Keir Starmer njoftoi dorëheqjen si kryeministër dhe lider i Partisë Laburiste. Kjo i hap rrugën zgjedhjes së një kryeministri të 7-të në 10 vite në Britaninë e Madhe.
Në një akt të paralajmëruar nga mediat në vend, 63-vjeçari doli në krah të bashkëshortes nga dera me numrin 10 në Downing Street, duke pranuar se ishte e qartë se partia e tij nuk e donte më. Teksa pohoi se kishte trashëguar një Parti Laburiste politikisht, financiarisht dhe moralisht të falimentuar, ai tha se e ndryshoi partinë duke rikthyer besimin te ekonomia, mbrojtja dhe siguria kombëtare.
Keir Starmer shprehet: “Pyetja që partia ime po bën tani është nëse unë jam personi më i përshtatshëm për të na udhëhequr në zgjedhjet e ardhshme të përgjithshme. Unë e kam dëgjuar përgjigjen e grupit tim parlamentar ndaj kësaj pyetjeje dhe e pranoj atë me dinjitet. Çdo vendim që kam marrë ka pasur si qëllim të vendosë në plan të parë vendin që dua. Kjo është arsyeja pse do të jap dorëheqjen.”
Ai tha se kandidaturat për ta zëvendësuar do të hapen më 9 korrik dhe se një kryeministër i ri do të zgjidhet para shtatorit. Megjithatë, rivali i tij Andy Burnham është kandidati kryesor.
Me zë emocional dhe lot në sy, Starmer falënderoi kolegët dhe tha se tani, detyra kryesore për të ishte të qenit një baba dhe bashkëshort i mirë, për familjen e tij të mrekullueshme, siç e quajti.
Presioni ndaj Keir Starmer u shtua ndjeshëm të premten, kur Andy Burnham, kryebashkiaku i Mançesterit të Madh, fitoi bindshëm një zgjedhje parlamentare për t’u kthyer në Westminster, duke mposhtur një kandidat nga Reformojmë Britaninë e Nigel Farage, e cila ka kryesuar sondazhet kombëtare për më shumë se një vit.
Kjo fitore u dha shpresë ligjvënësve laburistë se Burnham, një politikan karriere i njohur për aftësitë e tij komunikuese, mund të transformojë fatin e një partie që ka humbur mbështetje nën drejtimin e Starmerit, popullariteti i të cilit ka rënë në nivelin më të ulët për çdo lider britanik.
Kjo situatë u faturohet vendimeve ekonomike shumë të papëlqyera, si heqja e pagesës së energjisë për të moshuarit dhe rritja e taksave, si edhe skandaleve politike në qeveri. Gjithashtu, rasti i Peter Mandelson, i emëruar si ambasador në SHBA pavarësisht lidhjeve me Epstein, dëmtoi seriozisht besimin ndaj tij. (A2 Televizion)
A2 CNN Livestream
MUND TE LEXONI GJITHASHTU
