Rritet numri i viktimave në Rafah! Netanyahu: Ishte një gabim tragjik

Nga Erjon Dervishi
27 Maj 2024, 18:50 | Bota

Nuk kanë të ndalur vuajtjet e banorëve të Palestinës pas sulmeve të fundit izraelite. Numri i të vdekurve nga sulmi ajror në një kamp për civilët në Rafah ka shkuar në 45, duke përfshirë mbi 200 të plagosur. Informacioni vjen nga Ministrisë e Shëndetësisë së Palestinës në Gaza. Ndërkohë që në gjithë Rripin e Gazës vetëm në 24 orët e fundit janë vrarë 66 persona.

Kryeministri i Izraelit, Benjamin Netanyahu nxitoi ta quante aksident tragjik vrasjen e civilëve. Duke folur në parlamentin e Izraelit, Netnayahu ia hodhi përgjegjësinë Hamasit duke e etiketuar si një strategji të grupit militant.

“Në Rafah ne evakuuam një milion banorë të paprekur dhe, me gjithë përpjekjet, dje ndodhi një aksident tragjik. Ne i hetojmë rastet dhe nxjerrim përfundime. Për ne çdo person i paangazhuar që vritet është një tragjedi, për Hamasin është një strategji", u shpreh Benjamin Netanyahu.

Pas sulmit izraelit, Hamasi ka ndërprerë pjesëmarrjen e delegacionit të tij për negociata me Tel-Avivin. Hamasi vendimin e tij ua ka njoftuar përfaqësuesve të Egjiptit, Katarit dhe Shteteve të Bashkuara. Më shumë se gjysma e të vdekurve ishin gra, fëmijë dhe të moshuar, thanë zyrtarët shëndetësorë në Gazën e drejtuar nga Hamasi, duke shtuar se numri i të vdekurve ka të ngjarë të rritet nga njerëzit me djegie të rënda.

Pamjet të siguruara nga Reuters tregojnë zjarrin që shpërtheu dhe njerëzit që bërtisnin në panik. OKB i ka bërë thirrje Izraelit të kryejë një hetim "të plotë dhe transparent" për civilët e vrarë në Rafah dhe "të marrë masa të menjëhershme për të mbrojtur civilët.

Sakaq, Shtëpia e Bardhë ka vënë në dijeni opinioni publik se është në dijeni të sulmit izraelit në kampin e refugjatëve Rafah dhe po mbledh më shumë informacion për ngjarjen e rëndë. Kështu ka bërë të ditur një zëdhënës i Këshillit të Sigurisë Kombëtare.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Bruna Çifligu