Planeti është plot me vende të mahnitshme, por ka disa vende që konsiderohen "të ndaluara", pasi askush nuk mund ose nuk lejohet t'i vizitojë, qoftë sepse mund të jenë fatale për jetën e tij, qoftë sepse fshehin sekrete të mëdha.
Ishulli Poveglia
Ishulli i “përhumbur” i Poveglia ndodhet afër Venecias dhe sipas legjendës aty kanë humbur jetën më shumë se 160 mijë njerëz.
Poveglia është një ishull i vogël, i vendosur midis Venedikut dhe Lidos në Lagunën Veneciane, në Italinë veriore. Një kanal i vogël e ndan ishullin në dy pjesë të veçanta. Ishulli shfaqet për herë të parë në të dhënat historike në 421 dhe ishte i banuar derisa banorët e braktisën atë për shkak të luftës në 1379.
Për më shumë se 100 vjet duke filluar nga viti 1776, ishulli u përdor si një stacion karantine për ata që vuanin nga murtaja dhe sëmundje të tjera, dhe më vonë si një spital psikiatrik, që u mbyll në vitin 1968 dhe që atëherë ishulli nuk ka qenë i banuar.
Vizitat në ishull janë të ndaluara, por libra dhe artikuj të ndryshëm përmendin vizitat e shkrimtarëve dhe/ose fotografëve.
Ata që besojnë në fenomenet metafizike kanë pohuar se Povelia është vendi më i përhumbur në botë dhe hyrja në ishull është rreptësisht e ndaluar.
Kasaforta globale e farave të Svalbard
Svalbard Global Seed Vault ndodhet thellë brenda një mali, në një ishull të largët në arkipelagun Svalbard, 300 kilometra në veri të Rrethit Arktik. E themeluar nga qeveria norvegjeze në shkurt 2008, ajo është banka më e madhe e farës në botë.
Kutitë e farave nga e gjithë bota dërgohen në Kasafortën Globale të Farave për ruajtje të sigurt dhe afatgjatë në dhoma të ftohta dhe të thata. Është një nga objektet më të sigurta në botë, i projektuar për të mbijetuar edhe pas një katastrofe globale.
Kasaforta ndodhet 120 metra nën një mal ranor në ishullin Spitsbergen dhe ruhet nga sisteme të besueshme sigurie.
Banka ruan farat e disa dhjetëra mijëra llojeve të kulturave kryesore ushqimore si fasulet, gruri dhe orizi. Në total përmban fara që i përkasin më shumë se 4000 specieve bimore (kapaciteti i përgjithshëm: 4.5 milion ekzemplarë). Këto mostra janë rezerva të dyfishta të mbajtura në bankat kombëtare, rajonale dhe ndërkombëtare të farës.
Farat janë të paketuara në fletë alumini të trefishta dhe mbyllen me nxehtësi për të parandaluar hyrjen e lagështirës së ambientit. Fakti që objekti është i rrethuar nga permafrost ndihmon gjithashtu në sigurimin dhe ruajtjen e mostrave.
Arkivi Sekret i Vatikanit
Miliona njerëz vizitojnë Vatikanin në Romë çdo vit, por ka të paktën një vend që është rreptësisht jashtë kufijve të aksesueshëm nga publiku. Fjala është për “Arkivin Sekret të Vatikanit”, një godinë ku mbahen dokumentet shtetërore dhe korrespondenca e shtetit të Vatikanit.
Ato janë pronë e Papës aktuale dhe me vdekjen ose dorëheqjen e tij, pronësia i kalon Papës së ardhshme. Deri në fillim të shekullit të 17-të, ato ishin në bibliotekën e Vatikanit, por u ndanë pas veprimit të Papa Palit V në hapësirën e tyre me akses jashtëzakonisht të kufizuar. Ato mbetën të paarritshme për studiuesit e jashtëm deri në vitin 1881, kur Papa Leo XIII lejoi qasje të pjesshme në seksione të kufizuara të arkivit për studiues të jashtëm, një marrëveshje që ka qenë në fuqi që atëherë.
Aplikimet pranohen vetëm nga studiues të aprovuar me interes shkencor dhe njohuri të mjaftueshme të kërkimit arkivor. Për t'u pranuar, ata kanë nevojë për një letër rekomandimi nga një institucion akademik ose kërkimor ose nga një historian ekspert, ndërsa studentët e diplomuar nuk pranohen.
Ka kufizime të rrepta për aksesin në arkiv, ku qasja në çdo material pas vitit 1939 është e ndaluar, ndërsa ka një pjesë të tërë për marrëdhëniet personale me kardinalët që është e ndaluar nga viti 1922 e në vazhdim. (A2 Televizion)
A2 CNN Livestream
MUND TE LEXONI GJITHASHTU
