Ushtria izraelite sulmon spitalin më të madh në Gaza, 30 mijë persona brenda tij në panik për jetën

Nga A2 CNN
18 Mars 2024, 07:41 | Bota

Ushtria izraelite ka njoftuar një operacion ushtarak të precizionit të lartë në spitalin e Al Shifa në Gaza, e cila është struktura spitalore më e madhe në vend.

Sipas dëshmitarëve, bombardime të fuqishme janë dëgjuar që prej orëve të para të mëngjesit në zonën pranë spitalit. Operacioni nisi pas informacioneve të inteligjencës për praninë e zyrtarëve të lartë të Hamasit në kompleksin mjekësor.

"Ne e dimë se terroristët e Hamasit janë mbledhur brenda spitalit Al Shifa dhe po e përdorin atë për të organizuar sulme kundër Izraelit", tha një zëdhënës ushtarak izraelit, duke shtuar se ushtria e Tel Avivit do të kryejë një "përpjekje humanitare", gjatë sulmit dhe se pacientët e personeli mjekësor nuk janë të detyruar të largohen nga objekti.

Ndërkohë, sipas Ministrisë së Shëndetësisë në Gaza, rreth 30.000 njerëz, përfshirë civilë të zhvendosur, pacientë të lënduar dhe personel mjekësor, janë bllokuar brenda kompleksit mjekësor Al Shifa, nën sulmin e ushtrisë izraelite që nga mbrëmja e kaluar.

“Kushdo që përpiqet të lëvizë është në shënjestër të plumbave”, shkroi ministria në Telegram.

 

A2 CNN Livestream

Ditari nga Denisa Pasholli