Pas 46 ditësh nga sulmi në kanalin kryesor të Ibër-Lepencit në veri të Kosovës, sot është rikthyer në funksion pas riparimit të dëmeve fizike nga autoritetet kosovare. Kjo është bërë e ditur nga ministrja e Ekonomisë së Kosovës Artane Rizvanolli në një postim në Facebook.
“Kanali i rehabilituar i Ibër Lepencit hyri në funksion sot. Faleminderit punonjësve për angazhimin e jashtëzakonshëm. Kështu duhen e mbrohen asetet e shtetit", shkruan ministrja.
Autoritetet kosovare vlerësuan se rreth 400 mijë euro ishte dëmi i shkaktuar nga ky sulm, ndërsa dëmi i synuar ishte rreth 2,5 milionë euro.
Më 29 nëntor kanali i Ibër-Lepencit u sulmua me rreth 20 kilogramë eksploziv në muret e tij anësore duke nxjerrë rrjedhën e ujit jashtë shtratit, gjë që rrezikonte furnizimin me ujë dhe energji elektrike të një pjese të Kosovës.
Krerët e institucioneve të larta në Kosovë, fajësuan direkt Serbinë për këtë sulm, megjithëse Beogradi zyrtar e mohoi një gjë të tillë.
Gjithashtu, sulmi u dënua edhe nga vendet e Bashkimit Evropian dhe Shtetet e Bashkuara të Amerikës.
Kanali i Ibër-Lepencit është një nga asetet me rëndësi të Kosovës. Ai furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës (KEK) për ftohjen e termoelektranave të saj. (A2 Televizion)
A2 CNN Livestream
MUND TE LEXONI GJITHASHTU
