U promovua në një ceremoni në Bankën e Shqipërisë, libri i Akademikut, Prof. Dr Anastas Angjeli, “Institucionet e Bretton Woods dhe Shqipëria”.
Ky libër ofron një kolonë historike të ngjarjeve, shkaqeve dhe teorive ekonomike, të cilat i paraprinë krijimit të këtyre institucioneve.
Guvernatori i Bankës së Shqipërisë Gent Sejko, tha se “ajo çfarë e bën këtë libër të veçantë, është fakti se autori i shikon të tria këto institucione si projeksione të një vizioni politik e human që synojnë rritjen e stabilitetit dhe zhvillimin në nivel global”.
“Libri rendit në mënyrë të organizuar dhe të logjikshme marrëdhëniet ekonomike, financiare dhe ato politike që çuan në krijimin e rendit aktual botëror dhe sfidat me të cilat përballet ai”, u shpreh Sejko.
Këto institucione u ndërtuan mbi 3 parime bazë dhe me qëllimi ruajtjen dhe stabilitetin ekonomik e financiar. Krijimi i tyre, u bazua në krijimin dhe fuqizimin e institucioneve demokratike, garantimin e stabilitetit ekonomik e financiar dhe mundësisë së lëvizjes së lirë të mallrave, shërbimeve, kapitaleve e ideve dhe së treti, garantimi i mbështetjes me kapitale të mjaftueshme financiare për të siguruar rimëkëmbjen nga krizat dhe zhvillimin ekonomik afatgjatë.
“Libri “Institucionet e Bretton-Woodit dhe Shqipëria” (FMN, BB, GATT-OBT), është një kontribut i rëndësishëm në analizën e këtij bashkëpunimi, i efekteve të tij në tranzicionin dhe realitetin shqiptar, i arritjeve dhe vështirësive gjatë marrëdhënieve në këtë periudhë, në kontributin e këtyre institucioneve në politikëbërjen dhe vendimmarrjen në lidhje me zhvillimet më thelbësore financiare, monetare, ekonomike e tregtare”, u shpreh Prof. Dr Adrian Civici.
Ai shtoi se ky botim ka vlerë jo vetëm në aspektet teorike e historike të tij, por mbi të gjitha, në aspektet konkrete të lidhura me shumë zhvillime të rëndësishme në realitetin Shqiptar e rajonal në kuadrin e përmbylljes me sukses të procesit të gjatë e të vështirë të tranzicionit dhe hapjes së rrugës për integrimin europian të Shqipërisë.
“Autori na tregon se zhvillim i qëndrueshëm do të thotë të mësosh të jetosh brenda kufijve të vetëm të një planeti, në mënyrë të drejtë dhe dinjitoze për të gjithë, pa shfrytëzuar deri në pikën e varfërimit sistemet natyrore, nga të cilat ne nxjerrim burimet dhe pa e tejkaluar kapacitetin e tyre për të thithur mbetje dhe mbeturina të krijuara nga aktivitetet tona. Ky libër është një punim që i mungon në shqip si literaturës historike, ashtu dhe asaj ekonomike të deritanishme dhe që jep një kontribut të vlefshëm në pasurimin e saj”, u shpreh Prof. Dr, Nikollaq Pano.
Akademiku Vasil Tole vlerësoi librin dhe u shpreh se, ky ai vjen në vazhdën e punimeve të autorit si vlerë e shtuar e mendimit më të mirë ekonomik në Shqipëri. Në mbyllje të kësaj ceremonie, vetë autori mbasi foli për rethanat specifike dhe ecurinë e shkrimit të këtij libri, falenderoi të pranishmit dhe theksoi se ky libër do t’i shërbejë së pari studentëve por edhe publikut të gjerë. (A2 Televizion)
A2 CNN Livestream
MUND TE LEXONI GJITHASHTU
