A do e thyejë arrestin shtëpiak Sali Berisha? Paloka zbulon detaje nga skenari i protestës

Nga A2 CNN
19 Shkurt 2024, 21:15 | Politikë

Protesta kombëtare që PD e Rithemelimit dhe grupi i Gazment Bardhit kanë thirrur ditën e nesërme në bulevardin “Dëshmorët e Kombit”, për Edi Palokën është hallka vendimtare në mënyrën si opozita do të sfidojë pushtetin e Edi Ramës.

Sipas deputetit demokrat përmes pjesëmarrjes në tubim, shqiptarët do të japin sinjalin nëse janë ose jo dakord me regjimin që sipas tij është instaluar në 12 vite në vend.

“Nesër na duhet në një farë mënyrë të masim forcën po me praninë sa më masive të qytetarëve. Problemi është se na thonë pse s’na thërret opozita në protestë, ata që s’duan të protestojnë thonë se nuk vijmë tani se na ka thirrur politika. Të gjithë shqiptarët, të majtë dhe të djathtë kanë një mijë arsye të protestojnë. Nuk e kam për grupet që në këto 12 vite të qeverisë Rama kanë arsye për të protestuar, njerëz që ju janë prishur shtëpitë, bizneset etj... Masiviteti është tregues sesa ajo pakënaqësia, revolta, që njerëzit e shprehin nëpër kafene, shtëpi, rrjetet sociale. Nesër duhet të dalin, ju kam thënë të paktën tregojeni me prani që jeni kundër një regjimi të tillë. Thjeshtë të jenë aty. Nuk kërkohet ndonjë sakrificë e madhe, as do përmbysim nesër regjimin. Thjeshtë të jenë të pranishëm dhe të tregojnë që ne nuk jemi dakord më me këtë që po ndodh në Shqipëri."

Shifrat për Palokën do të shërbejnë për të matur forcat, ndaj mesazhi i tij 12 orë para protestës është që shqiptarët të jenë të pranishëm masivisht përballë Kryeministrisë.

“Nesër kryesoja është që njerëzit me praninë e tyre ta shprehin revoltën në shesh. Ka thënë Berisha jo unë: Popullin njëherë e drejton, njëherë të drejton. Ne nuk kemi ndërmend të ndalim askënd. Nesër për fat të mirë ose të keq do të jemi të gjithë njësoj. Sepse Berisha është në arrest dhe nuk do të jetë në drejtimin e protestës, ne të tjerët jemi të gjithë njësoj. Madje njëlloj me qytetarët që do të jenë aty të pranishëm. Nuk ndalim askënd.”

I pyetur në “Debati” i A2CCN për skenarin e protestës, Paloka iu shmang zbulimit të detajeve të hollësishme, por konfirmoi se Sali Berisha do të mbajë fjalën e tij në shesh.

Forma sesi ish-kryeministri do t’u drejtohet qytetarëve mbetet për t’u parë nesër sipas Palokës, i cili me batutë nuk përjashtoi as mundësinë e thyerjes së arrestit shtëpiak nga kreu i Rithemelimit.

“Sigurisht protesta do të ketë një agjendë të sajën , por unë vetë dhe gjithë drejtuesit e tjerë të PD nuk kemi ndërmend të ndalim askënd për formën që do të dojë të protestojë dhe të shprehi revoltën e tij. E di që do ketë një fjalë të Sali Berishës të paktën. Këtë do ta shohim nesër. Berisha nesër do t’ju flasë qytetarëve që do të jenë në protestë. Mund t’i teket Berishës të dali, ça ti them unë pastaj. Ai është në masën e një arresti politik. Këtu nuk ka drejtësi për fat të keq, sepse po të funksiononte një segment i saj do kishte një shpresë që mund të vinte ndryshimi dhe pa forma të ashpra. Berisha nesër do t’u drejtohet qytetarëve, forma pak rëndësi ka.”

 

A2 CNN Livestream

Dita jonë