Seanca parlamentare e kësaj të enjteje kishte vetëm një pikë që mbarte rëndësi për opinionin publik, interpelancën me ministren e Arsimit, Ogerta Manastirliu, mbi masat e marra nga dikasteri që drejtoi për garantimin e sigurisë në shkolla, ku si referencë kishte ngjarjen tragjike ku humbi jetën 14-vjeçari pranë 9-vjeçares Fan Noli.
Por nga fillimi i seancës deri në nisjen e interpelancës, Kuvendi u përballë me dy orë debate për procedurë parlamentare, ku opozita ngriti shqetësimin se Elisa Spiropali i kishte përjashtuar nga Komisioni i Venecias, i cili këtë të premte nis shqyrtimin e kërkesës së Parlamentit Shqiptar për mënyrën se si duhet të zbatojë vendimet e gjykatës kushtetuese kur kërkohet mocion për mandatin e një deputeti.
Me përfundimin e debatit të procedurës, seanca u duk se u fut në shinat e rendit të ditës, por disa fjalë të Ina Zhupës ndaj deputetit Erion Braçe, që kishin nisur më herët të shkëmbenin batuta me njëri-tjetrin, shkaktuan tension në sallë.
Erion Braçe: Dukesh si ruse por nuk je.
Ina Zhupa: O Erion, t’u rrit goja, sa shumw m*** tw ha goja”.
Këto fjalë sollën një fenomen të pa ndodhur ndonjëherë në parlament, bojkotin e shumicës duke pamundësuar vijimin e interpelancës.
Gazment Bardhi: Të vijë ministrja, e ka detyrim kushtetues.
Në sallë ishin vetëm 2 socialistë, Elisa Spiropali në drejtimin e seancës dhe Niko Peleshi, i cili vazhdimisht nuk merrte vëmendjen e kryeparlamentares kur kërkonte të fliste.
Kjo kërkesë u aprovua nga Spiropali, ndërsa Gazment Bardhi nisi një revoltë personale ndaj shumicës duke treguar edhe përse kolegia Zhupa kishte përdorur atë fjalor ndaj Erion Braçes.
Gazment Bardhi: I tha ruse dhe ti nuk reagove!
Seanca rifilloi pasi 30 minutash me lajmin se rendi i ditës do të vijonte të mbledhjen e ardhshme të parlamentit Jashtë salle, Ina Zhupa nuk tregoi pendesë për mënyrën se si ishte drejtuar Braçes, duke dhënë edhe shpjegim të fjalëve.
Kësisoj, i dhuroi rivales politike në krye të Ministrisë së Arsimit, mundësinë të shtynte në kohë interpelancën mbi sigurinë në shkolla, që ishte kërkuar nga vetë opozita. (A2 Televizion)
A2 CNN Livestream
MUND TE LEXONI GJITHASHTU
