Masat e sigurisë, bizneset fason kundërshtojnë protokollin e kuq

Nga A2 CNN
28 Prill 2020, 17:07 | Ekonomi
Masat e sigurisë, bizneset fason kundërshtojnë protokollin e kuq

Bizneset fason refuzojnë protokollin e kuq të vendosur nga qeveria për ashpërsimin e  masave higjieno-sanitare që duhet të zbatojnë gjatë procesit të punës. Përfaqësuesit e kësaj industrie i konsiderojnë të pamundura për t’u plotësuar kushtet e vendosura, për shkak të pamundësive teknike, por edhe rritjes së ndjeshme të kostove, që mund të çojnë deri në mbyllje të aktivitetit të tyre.

Ditët e fundit, qeveria vendosi kalimin e industrisë fason nga protokolli jeshil në atë të kuq, çka nënkupton më shumë masa për rritjen e sigurisë.

Fasoneritë janë shndërruar në një nga vatrat më të rrezikshme të përhapjes së koronavirusit. Vetëm në Krujë, nga 35 ndërmarrje fason që ushtrojnë aktivitet, 25 prej tyre janë mbyllur. Në këtë industri, janë të punësuar jo vetëm banorët e Krujës, por edhe ata të Kurbinit.

Rrezikohet vendi i punës për gratë në këtë sektor

Ndërkaq, Qendrën Aleanca Gjinore për Zhvillim, GADC ka monitoruar situatën në sektorin fason, në periudhë para koronavirusit por edhe pas saj.

Raporti ka dalë në disa përfundime, ku evidenton se gratë dhe vajzat, që përbëjnë edhe 90% të të punësuarve në fason rrezikojnë të mbeten pa punë, për shkak të mungesës së transportit për të shkuar në punë, mbylljes së shkollave, kopshteve dhe çerdheve, si dhe frikës nga infektimi.

Gjithashtu, puna e tyre rrezikohet edhe nga mospatja e kontratave të reja për kompanitë, veçanërisht nga Italia.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Denisa Pasholli