Ku është Kim Jong-un?

Një vit më parë, në këtë kohë, Koreja e Veriut po festonte. Më 18 nëntor 2022, vendi aziatik lëshoi ​​raketën balistike ndërkontinentale Hwasong-17, e cila ka kapacitet për disa koka bërthamore. Një ngjarje për të cilën u shpall një festë e re në fillim të muajit: Dita e Industrisë së Raketave.

Por, përtej caktimit të festës, Koreja e Veriut nuk mbajti asnjë event për të përkujtuar këtë ngjarje. Prova e ndonjë rakete tjetër pritej, ndoshta një festë e madhe, por asgjë nuk ndodhi. Heshtje totale nga ana e autoriteteve shtetërore, diçka e çuditshme kur përkujtohet një nga armët më të fuqishme të Koresë së Veriut.

Heshtja vjen në mungesë të liderit suprem, Kim Jong-un. Ku është një nga aleatët kryesorë të Vladimir Putinit? Asnjë nga mediat lokale nuk përmendi Ditën e Industrisë së Raketave, ndërsa udhëheqësi i Koresë së Veriut nuk duket në publik prej 29 ditësh, një nga periudhat më të gjata që nga ardhja e tij në pushtet, në vitin 2011.

Hera e fundit që media shtetërore raportoi për vendndodhjen e liderit të Koresë së Veriut ishte më 20 tetor. Në atë kohë, Kim Jong-un u takua me ministrin e Jashtëm rus, Sergei Lavrov, në Phenian. Që atëherë, asgjë. Nëse Kim Jong-un do të qëndrojë pa dalë në publik deri të shtunën e ardhshme, kjo do të ishte periudha e dytë më e gjatë e mungesës që kur është në detyrë.

Në fillim të këtij viti, ai pati një tjetër mungesë të theksuar në mediat shtetërore. Ai ishte jashtë vëmendjes për 36 ditë, derisa u shfaq në kuadër të një samiti ushtarak me zyrtarë të lartë për të urdhëruar stërvitje për “përgatitje për luftë”. Ndërsa në vitin 2014, kur ai u zhduk nga jeta publike për 40 ditë, qarkulluan zëra për probleme shëndetësore.

  (A2 Televizion)