Prokurori i Gjykatës Penale Ndërkombëtare ka shpallur urdhër-arrestin për dy liderë talebanë në Afganistan, duke përfshirë liderin suprem shpirtëror Haibatullah Akhundzada, duke i akuzuar ata për persekutim të grave dhe vajzave. Një deklaratë e bërë publike nga zyra e kryeprokurorit Karim Khan tha se hetuesit gjetën arsye të arsyeshme për të besuar se Akhundzada dhe Abdul Hakim Haqqani, i cili ka shërbyer si kryetar i drejtësisë që nga viti 2021, "mbartin përgjegjësi penale për krimin kundër njerëzimit të persekutimit mbi baza gjinore".
"Pas një periudhe shtyrjeje, zyra ime ka ekzaminuar në mënyrë të pavarur dhe të paanshme krimet e kryera kundër civilëve afganë. Pas një hetimi të plotë dhe në bazë të provave të mbledhura, zyra ime parashtron se ka arsye të arsyeshme për të besuar se Udhëheqësi Suprem i talebanëve, dhe shefi i drejtësisë së të ashtuquajturit Emiratet Islamike të Afganistanit, kanë përgjegjësia penale për krime kundër njerëzimit të persekutimit mbi baza gjinore. Zyra ime ka arritur në përfundimin se këta dy shtetas afganë janë penalisht përgjegjës për persekutimin e vajzave dhe grave afgane”, tha Karim Khan, Prokuror i ICC.
Persekutimi ka ndodhur në të gjithë Afganistanin nga 15 gusht 2021 - dita kur forcat talebane pushtuan kryeqytetin Kabul - deri në ditët e sotme, tha prokurori. Që kur grupi islamik u kthye në pushtet në vitin 2021, ai ka shtypur të drejtat e grave, duke përfshirë kufizimet e shkollimit, punës dhe pavarësisë së përgjithshme në jetën e përditshme.
Nga udhëheqësit e talebanëve nuk kishte asnjë koment për deklaratën e prokurorit, e cila u mirëprit nga grupet që mbrojnë të drejtat e grave. Tani pritet që çështja do t'i kalojë një paneli prej tre gjyqtarësh në GJNP që të vendosë për kërkesën e prokurorisë, e cila nuk ka një afat të caktuar. Procedura të tilla zgjasin mesatarisht tre muaj.
Kjo është e parë që prokurorët e ICC-së kanë kërkuar publikisht urdhër në hetimin e tyre për krimet e mundshme të luftës në Afganistan, i cili daton në vitin 2007 dhe dikur përfshinte krime të supozuara nga ushtria amerikane atje. (A2 Televizion)
A2 CNN Livestream
MUND TE LEXONI GJITHASHTU
