"Vlera simbolike, gjeostrategjike," Lleshaj: Pse NATO zgjodhi Shqipërinë për bazën e saj të vetme në Ballkanin Perëndimor?

Nga A2 CNN
4 Mars 2024, 20:11 | Aktualitet

“Një bazë me vlerë simbolike, të rëndësishme gjeopolitike apo edhe historike.” Kështu e komentoi ish-ministri i Brendshëm, Sandër Lleshaj inaugurimin e bazës ushtarake të Kuçovës ditën e sotme.

I ftuar në “Ditari” më Bruna Çifligun, ish-ministri shpjegoi po ashtu, se përse sipas mendimit të tij, u zgjodh Shqipëria për vendosjen e një baze të tillë të NATO-s.

“Nga gjashtë vendet e atij që ne quajmë Ballkani Perëndimor, edhe po të përpiqeshe ta bëjë ndryshe, nuk mund të gjeje një vend më të përshtatshëm. Nga na gjeografike, politike. Shqipëria është një vend i stabilizuar. Kemi kontribuar prej vitesh në NATO. Vendet e tjera janë ende vende pastabilizuara, në kuptimin e parametrave që kërkon NATO, për të ndërtuar një bazë.”

Sipas ish-ministrit, Shqipëria ishte një zgjidhje e pashmangshme qoftë edhe për konsistencën që ka treguar sa i përket gatishmërisë për të treguar se është një partner i qëndrueshëm i Aleancës së Atlantikut verior.

Por a do të ketë përfitime ekonomike zona ku ndodhet baza? Lleshaj thotë që impakti do të jetë pozitiv për banorët e zonës. Dhe, ish-ministri beson se do të ketë vijueshmëri me projekte të ardhshme. 

“Ardhja është, një shenjë e mirë. Një lloj fare që besoj se do të ketë një vijueshmëri. E rëndësishme është të bëhet një adresë e NATO, ku do të ulen avionë, do të vijnë njerëz. E rëndësishme është të jesh në hartë. Jam optimist se kjo do të vijojë jo vetëm në aspektin ajror, por edhe detar.”

Baza e Kuçovës është përkthyer nga shumëkush edhe si një mesazh i qartë i dërguar në drejtim të Rusisë, e cila ka Serbinë, si satelitin e saj në Ballkan, në një kohë kur situata në kufi me Kosovën ka qenë e tensionuar. 

“Që nga viti 2014, po ndodh diçka shumë e madhe. Shënoi momentin kur një shtet i madh, sulmoi ushtarakisht një shtet tjetër. NATO nuk mund të rrijë indiferente. Ka vende të tjera, përpos Ukrainës, që ndihen të rrezikuara,” shtoi Sandër Lleshaj.

 

A2 CNN Livestream

Dita jonë