Sondazh: Çfarë ju pengon për t'u ushqyer shëndetshëm?
  • Çmimet e larta 89%
  • Mungesa e kohës 0%
  • Mungesë motivimi 11%
  • Lodhja fizike 0%

Shqipëria kërkon partnerë ekonomikë, Arabia territore për të investuar

Nga A2 CNN
1 Mars 2024, 20:36 | Ekonomi

Shqipëria po kërkon partnerë të rinj ekonomikë, ndërsa Arabia Saudite territore për të investuar. Përfaqësues nga dy shtete me diferencë të madhe gjeografike, por me vizion të përbashkët atë “2030” u takuan në Tiranë për të gjetur ura lidhëse bashkëpunimi.

“Shqipëria ka bërë një sërë hapash para në drejtim të përmirësimit të klimës së të bërit biznes për të tërhequr investitorët e huaj. Gjithashtu vendi ynë ka mjaft potenciale për të investuar në turizëm, energjinë e pastër dhe në infrastrukturë”, u shpreh ministri Gonxhja.

Ftesa e ministrit të Ekonomisë, Kulturës dhe Inovacionit, Blendi Gonxhja u mirëprit nga kryetari i Federatës së Dhomave Saudite.

“Ne kemi firmosur një sërë marrëveshjesh në fushën e infrastrukturës, drejtësisë apo tregtisë. Kemi arritur dakordësi edhe për shmangien e taksimit të dyfishtë dhe luftën ndaj evazionit. Kemi 4-fishuar shkëmbimet tregtare me Shqipërinë vitet e fundit”, tha Hasan Mujeb Al-huëaizi, Kryetar i Federatës së Dhomave Saudite.

Të dhënat nga Instituti i Statistikave tregojnë se nga pak më shumë se 11 milionë euro importe dhe eksporte në 2018-n, shkëmbimet tregtare vitin e shkuar kapën vlerën e 44.5 milionë eurove.

Në këtë total, 40 milionë euro ishin importe, ndërsa kompanitë shqiptare shitën produkte në vlerën e vetëm 4.5 milionë eurove.

“Kemi të gjithë potencialin për të zhvilluar bashkëpunimin ekonomik dhe për të intensifikuar shkëmbimet tregtare”, u shpreh Ines Muçostepa.

Ministrja e Bujqësisë, Anila Denaj iu tregoi 50 sipërmarrësve nga Arabia Saudite edhe një sektor ku sipas saj ka shumë potencial për investim.

“Janë bimët medicinale që kanë shumë interes nga e gjithë bota. Një sektor ky që ka pasur rritje të ndjeshme", deklaroi Denaj.

Aktualisht në Shqipëri operojnë me aktivitetet e tyre 55 kompani nga Arabia Saudite, ndërsa synimet është që ky numër të dyfishohet në dy vitet e ardhshme.  

A2 CNN Livestream

Ditari nga Denisa Pasholli