“Sundimi i ligjit”, me pistoletë në brez rrugëve të Tiranës, arrestohet 37-vjeçari

Nga A2 CNN
17 Nëntor 2023, 10:06 | Kronikë
“Sundimi i ligjit”, me pistoletë në brez rrugëve
Pistoleta e sekuestruar

Policia e Shtetit njofton se, ka arrestuar në Tiranë një 37-vjeçar në kuadër të operacionit “Sundimi i ligjit”, për veprën penale “Mbajtja pa leje dhe prodhimi i armëve, armëve luftarake dhe i municionit”.

Në pranga ka rënë shtetasi A. L., 37 vjeç, banues në Tiranë, pasi nga kontrolli që i është bërë në lokalin ku po qëndronte, shërbimet e policisë i kanë gjetur një pistoletë me municion luftarak.

Njoftimi i policisë:

Tiranë/Vijon operacioni policor i koduar “Sundimi i ligjit”, për kapjen e shtetasve të shpallur në kërkim dhe të atyre që posedojnë armë zjarri, pa leje. Në kuadër të këtij operacioni, nga Sektori për Hetimin e Narkotikëve në DVP Tiranë u finalizua operacioni policor i koduar “Befasia”. U kap në flagrancë me armë zjarri pistoletë me municion luftarak, në lokal, vihet në pranga 37-vjeçari. Sekuestrohen arma e zjarrit pistoletë dhe municioni luftarak.

Shërbimet e Sektorit për Hetimin e Narkotikëve të DVP Tiranë, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e siguruara në rrugë operative se në një lokal në rrugën “Him Kolli”, ndodhej një shtetas i armatosur, kanë organizuar dhe finalizuar operacionin policor të koduar “Befasia”, për kapjen e tij.

Gjatë operacionit, shërbimet e Policisë kanë ndërhyrë në lokalin ku po qëndronte shtetasi A. L., të cilit gjatë kontrollit fizik i gjetën një armë zjarri pistoletë me municion luftarak. Në vijim të veprimeve procedurale u arrestua në flagrancë shtetasi A. L., 37 vjeç, banues në Tiranë, për veprën penale “Mbajtja pa leje dhe prodhimi i armëve, armëve luftarake dhe i municionit”.

Arma e zjarrit dhe municioni luftarak u sekuestruan në cilësinë e provës materiale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Ditari nga Loneta Progni