Sali Berisha kërkoi votën e qytetarëve të Tiranës për Belind Këlliçin në mbylljen e fushatës elektorale që u mbajt në sheshin “Nënë Tereza” duke e cilësuar atë si kandidatin e së ardhmes që do të ndryshojë jetesën e banorëve të kryeqytetit.
“Belind Këlliçi është prototipi më i mirë i të riut të suksesshëm. Ne ndjehemi krenar se ai garon si më i shkolluari, më me energji dhe me projektet më të mira në historinë e këtij qyteti.
Nuk ishte e lehtë të premtonte transportin falas, por nuk mund të mos e premtonte kur mendonte rëndimin që ky transport u shkaktonte qytetarëve të Tiranës, u shkaktonte veçanërisht banorëve të fshatrave të Tiranës.
Ai u zotua për çlirimin tuaj nga taksat, nga tatimet. Pra, Belind Këlliçi paraqiti, premtoi një Tiranë tjetër për qytetarin, për kushtet e jetesës së tij. Por dy gjëra, ftoj qytetarët e Tiranës të mos harrojnë. Nuk ka krim më të shëmtuar se sa ne sot të jetojmë në një nga dhjetë qytetet më të ndotura të planetit.
Ja ku është Belind Këlliçi, njëri prej jush, njëri mes jush. U paraqit para jush me vërtetësinë, me sinqeritetin dhe besimin te ju”, u shpreh Berisha.
Ish kryeministri sulmoi kryebashkiakun Veliaj duke thënë se në 8 vite të drejtimit të bashkisë prej tij Tirana është kthyer në qytetin me ajër më të papastër.
“Ky kryetari fals në tetë vite i garantoi qytetit ajrin më të papastër, ajrin me substancat më toksike. Si e zgjidhi këtë punë? Duke ndaluar monitorimin e ajrit.
Ky u bë famoz në Europë, në botë me pyllin e tij orbital. 1 milionë pemë është vjedhja e faturës së 1 milionë fidaneve. Unë e konsideroj këtë vjedhjen më skandaloze që mund të ketë bërë një kryetar bashkie.
Edhe ky është një moment, krahas programit të shkëlqyer, që të votoni Belind Këlliçin, të votoni numrin 1, të votoni Bashkimin për Fitoren.
Thirrja ime është edhe njëherë të votojnë kandidatët e primareve, të votojnë yjet e lirisë, të votojnë kandidatët e ndryshimit, kandidatët e fitores”, deklaroi Berisha. (A2 Televizion)
A2 CNN Livestream
MUND TE LEXONI GJITHASHTU
