Sondazh: Të bëhesh i pasur në Shqipëri është:
  • E lehtë 0%
  • E vështirë 80%
  • E pamundur 20%

Kontrata koncesionare, SPAK goditi edhe “Sterilizimin”, Rama: Shenjë e drejtësisë së pavarur

Nga A2 CNN
18 Gusht 2023, 10:20 | Politikë
Kontrata koncesionare, SPAK goditi edhe “Sterilizimin”, Rama:

Arrestimet e SPAK për koncesionin e sterilizimit qeveria i konsideron meritë të saj. Ndonëse prapa hekurave u vendosën të tjerë ish-zyrtar të maxhorancës socialiste, Edi Rama i sheh këto arrestime të pamundura, nëse votat e socialisteve nuk do të kishin ngritur prokurorinë e posaçme, bërthama e reformës në drejtësi.

“Disa flasin sot sikur SPAK-u është dallga e Zotit dhe qeveria porti i Djallit. Po ata harrojnë se dallgën e drejtësisë e ka ngritur në krye të herës guximi, vullneti dhe ambicia për Shqipërinë e pikërisht kësaj qeverie, e cila ndryshon si dita me natën me ato të mëparshme te 100 vjetëve pengmarrje të drejtësisë”, shkruan Rama.

Në reagimin e tij Edi Rama nuk thotë asnjë fjalë për kontratën koncesionare të sterilizimit që tashmë po provohet dita-ditës se ka qenë korruptive dhe në konflikt interesi, por ndalon vetëm te vullneti i maxhorancës për të miratuar reformën në drejtësi, për të cilën thotë se nuk do ta pengojë asnjëherë në punën e saj.

“Kjo qeveri dhe askush tjetër e hapi me gjoks rrugën e drejtësisë së re dhe kurrë nuk do ta pengojë drejtësinë në rrugën e vet, kudo ku ajo të hyjë, brenda qeverisë, rrotull saj, mbrapa saj apo nën ombrellën e saj. Falë besimit se ky vend bëhet dhe fuqisë së kësaj qeverie për të hequr dorë nga kontrolli i drejtësisë, e për ta mbështetur atë pa kushte kundër korrupsionit e krimit të organizuar, Shqipëria Europiane, që po hedh shtat dita - ditës mes 1000 sfidave, pengesave e vështirësive”.

Koncesioni i sterilizimit ka qenë ndër kontratat më të reklamuara gjatë qeverisë Rama 1, por prej vitesh është akuzuar nga opozita si një marrëveshje korruptive.

Reagimi i Ramës

Puna e pandërprerë e SPAK-ut dhe GjKKO edhe në gusht meriton respekt e falënderime! Me këtë rast le të rikujtojmë kush e premtoi, filloi dhe mundësoi Reformën në Drejtësi, pas një kohe të gjatë lëngimi të Shqipërisë në batakun e padrejtësisë, kur askush s’kishte guxim as ta mendonte, jo ta bënte drejtësinë të pavarur nga qeveria.

SPAK-u dhe Byroja Kombëtare e Hetimit nuk ranë nga qielli, po erdhën në jetë si shprehje e vullnetit të sinqertë e të palëkundshëm shtetndërtues. Nuk ishin fjalë të bukura si ato të 100 vjetëve të shkuara me radhë, kur unë dhe Partia Socialiste iu zotuam popullit shqiptar, se do të ndërtojmë një drejtësi të re, të pavarur, europiane, që do t’i japë fund kancerit të pandëshkueshmërisë. Kjo drejtësi sot ka lindur e po rritet përditë, sepse Partia Socialiste e Shqipërisë mbajti zotimin e saj më solemn e më të vështirë për të realizuar, përballë 100 viteve përqeshjeje me drejtësinë në historinë e shtetit shqiptar, kur nuk u prek kurrë dot nga drejtësia asnjë individ i pushtetshëm apo i lidhur me pushtetin, ku drejtësia ishte një shëmtirë e fortë me të dobëtit dhe e dobët me të fortët.

Disa flasin sot sikur SPAK-u është dallga e Zotit dhe qeveria porti i Djallit. Po ata harrojnë se dallgën e drejtësisë e ka ngritur në krye të herës guximi, vullneti dhe ambicia për Shqipërinë e pikërisht kësaj qeverie, e cila ndryshon si dita me natën me ato të mëparshmet e 100 vjetëve pengmarrje të drejtësisë. Kjo qeveri dhe askush tjetër e hapi me gjoks rrugën e drejtësisë së re dhe kurrë nuk do ta pengojë drejtësinë në rrugën e vet, kudo ku ajo të hyjë, brenda qeverisë, rrotull saj, mbrapa saj apo nën ombrellën e saj. Falë besimit se ky vend bëhet dhe fuqisë së kësaj qeverie për të hequr dorë nga kontrolli i drejtësisë, e për ta mbështetur atë pa kushte kundër korrupsionit e krimit të organizuar, Shqipëria Europiane, që po hedh shtat dita - ditës mes 1000 sfidave, pengesave e vështirësive, do t'i provojë vetes e botës se historia nuk është një mallkim i përjetshëm, se historinë janë vetë njerëzit e çdo gjenerate që e shkruajnë me forcën e ëndrrave, shpresave, këmbënguljes së tyre dhe se në ngjitjen drejt majës që meritojnë brezat që vijnë, këtë vend nuk ka më forcë që ta ndalë të shkruajë një histori të re.

https://a2news.com/2023/08/17/dosja-e-sterilizimit-gjkko-orienton-spak-te-hetoje-dhe-ish-ministrat-beqja-e-cani/
https://a2news.com/2023/08/17/sterilizimi-cani-pas-daljes-nga-spak-nuk-e-njoh-biznesmenin-ilir-rrapaj-kam-zbatuar-ligjin/
https://a2news.com/2023/08/17/arrestohet-ish-zv-ministri-i-shendetesise/

A2 CNN Livestream

Ditari nga Bruna Çifligu