Shqipëria mungoi në takimin ballkanik, Kathimerini: Rama nuk u ftua pasi kaloi kufirin me çështjen Beleri

Nga A2 CNN
22 Gusht 2023, 10:10 | Politikë
Shqipëria mungoi në takimin ballkanik, Kathimerini: Rama nuk u ftua

Greqia bëri bashkë liderët e Ballkanit dhe zyrtarët më të lartë të Bashkimit Europian në një takim dhe darkë informale në Athinë.

Por në atë event mungoi përfaqësimi nga Shqipëria, për shkak të ftohjes së raporteve nga përplasjet për çështjen Beleri. Fokusi kryesor, të paktën në njoftimin zyrtar, ishte “përshpejtimi i përpjekjeve të vendeve të rajonit për anëtarësim në BE”.

Kjo u pasqyrua edhe në deklaratën e konkluzioneve të punimeve, duke përfshirë në të edhe mbështetjen për anëtarësimin e Ukrainës dhe Moldavisë në bllokun europian. “Ne besojmë fort se 20 vjet pas Samitit të Selanikut dhe në dritën e realitetit të ri gjeopolitik, ka ardhur koha për të miratuar një qëllim përfundimtar të guximshëm dhe ambicioz që do të shërbejë si udhërrëfyes, frymëzim dhe kontekst”, shkruhet në pikët 8 të konkluzioneve.

Gjithashtu nënvizohet se nuk do të ketë rrugë të shkurtra për anëtarësimin e vendeve, me rekomandimin që ato të bëjnë reformat e kërkuara. Mediat në Athinë raportojnë për 3 fitore të rëndësishme nga ky event. Fitorja e parë, sipas Kathimerinit, është që Greqia konfirmon rolin e saj si shtet lider në rajonin e Ballkanit.

“Qëllimi i dytë i arritur është mesazhi i rëndësishëm i mosftesës së kryeministrit shqiptar Edi Rama në darkë. Mesazhi nuk i drejtohej vetëm Tiranës, por shkoi në të gjitha drejtimet dhe konfirmon se Greqia nuk do të tolerojë asnjë lëvizje që cenon interesat e saj ose që nuk është në përputhje me standardet europiane. Qëndrimi i Athinës ka qenë prej kohësh i qartë se qeveria shqiptare ka tejkaluar kufirin me çështjen Beleri”, shkruan media Kathimerini. Mes të pranishmëve në takim, përveç të ftuarit të nderit, presidentit ukrainas Volodymyr Zelensky, ishin dhe presidentja e Komisionit Europian, Ursula von der Leyen, presidenti i Këshillit të BE-së, Charles Michel, si dhe liderë e përfaqësues nga Serbia, Kosova, Mali i Zi, Bosnja e Hercegovina, Maqedonia e Veriut, Bullgaria, Kroacia, Rumania dhe Moldavia. Përplasjet Kosovë-Serbi morën vëmendje edhe në këtë takim, me Vuçiç që kërkoi sqarime për praninë e Kurtit në darkën e Mitsotakis, në një kohë kur Greqia nuk e njeh pavarësinë e Kosovës. Kurti kërkon nga Von Der Leyen që BE-ja t’i heqë masat ndaj Kosovës.

A2 CNN Livestream

A2 Sport