Beqaj: Koncesioni ka sjellë përfitime për njerëzit dhe financat publike

Nga Julian Kasapi
18 Mars 2024, 15:01 | Kronikë

Ish-ministri i Shëndetësisë Ilir Beqaj është zyrtarisht i pandehur për dosjen e sterilizimit. Akuza e shpërdorimit të detyrës iu komunikua këtë të hënë kur u paraqit në Prokurorinë e Posaçme. Pas daljes nga ambientet e Prokurorisë, ish-ministri hodhi akuza ndaj prokurorisë e cila sipas tij nuk ka bërë siç duhet hetimin.

“SPAK duhet ta kishte filluar vlerësimin e punës sime me përmbushjen e detyrimeve të Kushtetutës he të ligjit të kujdesit shëndetësor sepse garantimin e kujdesit shëndetësor të barabartë për të gjithë shqiptarët, nga veriu në jug unë e kam pasur edhe detyrim, edhe mision”, tha Beqaj pas daljes nga gjykata.

Ai mbrojti koncesionin e sterilizimit duke thënë se 445 mijë shqiptarë janë operuar në kushte të sigurta ndërsa tha se të vërtetën e tij do e ballafaqojë në Gjykatën e Posaçme. “Prokuroria, në 50 muaj, nuk ia doli të hetojë dy elemente kryesorë që ka një proces sterilizimi, uljen e ditëqëndrimit të pacientëve në spital dhe uljen e ditëve të përdorimit të antibiotikëve në spital. Nëse do të kishin bërë këtë vlerësim, që ne do t’i kërkojmë të bëhet, atëherë konvertimi i këtyre kursimeve në para do ta nxjerrë me të vërtetë një proces në përfitim për financat publike dhe xhepat e qytetarëve”, tha Beqaj.

“Të vërtetën time do ta përballoj në gjykatë ku besoj se do të dalë e vërteta e përfitimeve që kanë pasur të gjithë shqiptarët nga ky proces sterilizimi”.

Ai u shpreh se Prokuroria e Posaçme  duhet të kishte hetuar se përse nga periudha prill 2010 deri në shtator 2013 nuk ishte vendosur ne pune centrali i sterilizimit kur ISHP kërkonte mbylljen e sallave te kirurgjisë në QSUT.

Beqaj do të jetë në bankën e të akuzuarve së bashku me ish-zëvendësin e tij në Ministrinë e Shëndetësisë Klodian Rrjepaj dhe biznesmenin Ilir Rrapaj që mori koncesionin e sterilizimit, të dy në burg që prej gushtit të vitit të kaluar. Zv.ministri akuzohet për shpërdorim detyre ndërsa biznesmeni për mashtrim.

Në gjykim do të shkojnë edhe 6 ish-zyrtarë të Ministrisë së Shëndetësisë të cilët kanë qenë anëtarë të Komisionit të tenderit të sterilizimit. SPAK ka dyshime për shkelje në procesin e koncesionit të sterilizimit me vlerë 100 milionë euro dhe afat10-vjeçar të fituar nga biznesmeni Ilir Rrapaj. Prokuroria thotë se në dhënien e koncesionit të akuzuarit nuk kanë respektuar ligjin dhe kanë shpërdoruar detyrën ndërkohë që sipas akuzës Ilir Beqaj ka pasur njohje dhe miqësi të fortë me biznesmenin.

A2 CNN Livestream

Ditari nga Denisa Pasholli